Зурба алим ва бажарагълу шаир

Гьажи Абдурагьман эфенди ал-Ахты (1821-1915-йисар) зурба алим ва бажарагълу шаир хьайиди успатун патал тек кьве къасида ва ада 1912-йисуз Темир-Хан-Шурада чап авунвай «Асас ад-дин ва-ль-иман» тIвар алай ктаб (араб чIалал), ада шиирдиз элкъуьрнавай керет жедвел (таблица умноже-ния) къалурун бес я. А девирда вири Дагъустанда Алкьвадар Гьасан эфендидин гафунал гаф эцигиз жуьрэтдай алим вич авачир. Амма Гьажи Абдурагьмана адахъ галаз ачухдиз диндин месэлайрин гьакъиндай акъажунар ийизвай, яни къарарар акъудун патал (Гъалиб Садыкьи, 15-сентябрь, 1995-йис).

Дикъетдивди кIела, куьн хьухь хабардар,

Хъсан кьатIутI вуж я чакай хатакар.

АквазватIа квез и рекье зун гъафил,

Сад кьванни ийиз тахьуй заз маил.

Гуругь-гуругь мусурманар хьанва чун,

Гьуьжетариз сада масад канва чун.

Гила кьванни и рекье жен ферикъат,

Аллагьдин дуьз рекьел хьунихъ гьерекат…

(Къасидадай)

Гьажи Абдурагьман эфендидихъ Ахцегьа 500 касдилай гзаф паталай атайбуруз кIелдай мум-кинвал гудай медреса авай лугьузва. Ахцегьрин Жуьмя мискIиндин эцигунрин кьиле авайди Гьажи Абдурагьман эфенди тир. Ада ирид сефердилай гзаф Меккедиз гьаж авуна. Азадвилин ва гьахълувилин тереф хуьзвай инсан яз, Гьажи Абдурагьманавай 1877-йисан бунтара иштирак тавуна акъвазиз хьанач. И тахсирда ам сифте Дербентдин зинданда туна, ахпа Урусатдиз суьргуьндиз акъудна. Гьажи Абдурагьман эфенди ал-Ахтыдин къаси-даяр ва керет жедвел, иншаАллагь, чна газетдин къведай нумрадиз гуда.

 Къуй Аллагьди I Абдурагьман эфендидин берекатдикай ва чирвилерикай чазни пай гурай! Я Аллагь, гележегдани лезгийрин чилел медресаяр ачуха ва чи веледриз а медресейра кIелдай мумкинвал це! Алай вахтунда чпин веледар диндин рекьяй савадлу хьана кIанзавай диде-бубайри чпин веледар Дагъустандин Исламдин университетдиз (ДИУ) ракъуррай.

Чи мухбир.

Лезгинский исламский просветительский портал