Абу Бакр ас-Сиддикь

Абу Бакр (Аллагь рази хьуй) зурба кас я, адакай Аллагьдин Пайгъамбарди (Аллагьдин салатни салам хьуй адал)  икI лагьанай: 
«Пайгъамбаррилай алатайла, Абу Бакралай лайихлу кас хьайиди туш». 
Пайгъамбарди (Аллагьдин салатни салам хьуй адал) адалай мадни гзаф кьадар тарифар авунай.  Ам диндин къеле я. «Эгер терездин са хилевири ксарин дин, муькуь хилени Абу Бакран дин эцигайтIа, Абу Бакран пад залан жеда», - лугьудай Мугьаммад Пайгъамбарди (Аллагьдин салатни салам хьуй адал) 
Абу Бакр Абу Къугьафадин хва я, ам ирид лагьай ата-бубадалди Аллагьдин Пайгъамбардин (Аллагьдин салатни салам хьуй адал)  михьи тир несилдихъ галаз мукьва жезва. Ам филдин йисуз «Фил» лугьудай вакъиайрилай гуьгъуьниз кьве йисни пуд варз алатайла дидедиз хьана. Адан диде Салма, адаз (Умму аль-Хайр) хийирдин Диде лугьудай, ада Исламдин сифте йисара дин кьабулнай. Адан буба Абу Къугьафади мусурманри Мекке кьурдалай гьуьгъуьниз дин кьабулнай. 
Гьеле Ислам кьабулдали вилик Абу Бакр чIуру крарикай яргъа тир ва ада гьич садрани ички ишлемишайди туш. 
Абу Бакр алверар авуна Йемендай хтай чIавуз, сифте абу Джагьла ахпани динсузрин кьиле авай ксари цIийиз башламиш хьанвай Мугьаммадан (Аллагьдин салатни салам хьуй адал)  пайгъамбарвилин миссия кьацIуриз алахъна. Абуруз гьа сифте кьилелай Абу Бакр (Аллагь рази хьуй) тешвишда тваз кIан хьана. Ам лагьайтIа, гьич садазни яб тагана, Аллагьдин Пайгъамбардин (Аллагьдин салатни салам хьуй адал)  патав рекье гьатна. Адаз пайгъамбарвилин гьакъикъат чир хьана. Кьве рикIинни тахьана ада Ислам кьабулна.
Абу Бакр (Аллагь рази хьуй) вири мусурман уьмметдиз чешне хьана ва ам Сиддикьият - гьакъикъатдин Шагьид лугьудай дережадив агакьна. 
Абу Бакран (Аллагь рази хьуй) рахунар гъавурда гьатдайбур, вични гуьрчег абурар алай, яхун ва юкьван буйдилай кьакьан кас тир. Адан чин яхунди, вилер хъалхъамриз хъфенвайбур, пел тIурар алайди ва чуруни кьериди тир.
 
Абу Бакралай Аллагьди  ва Пайгъамбарди (Аллагьдин салатни салам хьуй адал)  авур тарифар
«Абу Бакр кIан хьун ва адаз чухсагъул лугьун – им зи уьмметдин буржи я». 
«Пайгъамбар гъейри зи уьммет патал виридалайни хъсан къилихдин кас Абу Бакр я». 
«Мусурман дишегьлийрин арадай виридалайни заз кIаниди Айша я. Итимрикай лагьайтIа – адан буба». 
«Хъсан ерийрин кьадар пуд вишни пудкъадав агакьна ава. Я Аллагьдин Пайгъамбар (Аллагьдин салатни салам хьуй адал)  ! Абурукай сад хьайитIани захъ авани?»- лагьана хабар кьуна Абу Бакра. «Я Абу Бакр! Абур вири вахъ ава»,- жаваб гана гьакъикъатдин нурди. 
«Гьакъикъатда, гьам дуствиле гьамни девлетда залди жумартлу кас Абу Бакр я. Эгер за жуваз дуст хкядайвал хьанайтIа, за Абу Бакр хкядай. Исламдал бинеламиш жезвай стхавал амай дуствилерилай виняй я».
 
Кат1 ама...
 
Лезгинский исламский просветительский портал