Абу Бакр ас-Сиддикь Часть 3

Чан гьайиф татун
Са женгиниз гьазур жедай чIавуз Абу Бакр (Аллагь рази хьуй) чандилай гъил къачунин вини дережадив агакьна. Вичин девлет вири гайи чIавуз адавай хабар кьунай: «Вуна ви хизандиз вуч тунва?» Ада жаваб гана: «За абуруз Аллагь ва Адан Пайгъамбар  (Аллагьдин салатни салам хьуй адал) туна, гьабур бес тушни мегер?» Гьакъикъатда, и чIехи касди вичин чанни девлет Аллагьдин рекье гана, Аллагь патал кIвалахна, гьам себеб яз гзаф ксариз гьидаят атана. Абурун арадай тIварван авайбур ибур я: Усман ибн Аффан, Зубайр ибн Аввам, Абдурагьман ибн Ауф ва Саъд ибн Абу Вакъкъас. Билял Гьабашидал зулумар тухудай чIавуз, ада ам пул гана азад ийиз тунай. Абу Бакра (Аллагь рази хьуй) гьич са куьнизни килиг тавуна Шариатдин истемишунар кьилиз акъуддай. Вич халиф тир вахтунда закят тагузвай са таифадал ам кьушун гваз фена.
 
Регьимлувал
Абу Бакран кьетIен ерийрикай сад регьимлувал я. И еридиз килигна Аллагьдин Пайгъамбарди  (Аллагьдин салатни салам хьуй адал) адан тарифардай. Вичин дуайрикай сада Абу Бакра ихьтин тIалабун авунай: «Я Аллагь, Эхиратда зи беден акьван еке ая, адав Жегьеннем ацIуриз жедайвал, амай вири лукIварин паталай зун кудайвал». Им регьимлувилин вини дережа тирдан са шакни алач.
 
РикIелди Аллагьдин зикир авун
Абу Бакр (Аллагь рази хьуй) гзаф гьахълу кас тир, адан рикI Аллагь кIанивиливди (мугьаббат) ацIанвай. Ам гьи гьалда аваз хьайитIани, иллаки йифериз купIунал алай чIавуз, адай а кIанивал аквадай. Савр магъарада Аллагьдин Пайгъамбардин  (Аллагьдин салатни салам хьуй адал) насигьатдалди Абу Бакра (Аллагь рази хьуй) рикIелди Аллагь рикIел гъиз (зикр) башламишна. Гуьгъуьнлай Суннадал амал ийизвайбурун (Агьл ас-Сунна) цIикьвед мешребдикай кьуд рикIелди ийизвай зикрдал бинеламиш хьана.
Катl ама...
Источник: Ас Салам
 
 
Лезгинский исламский просветительский портал