Мусурмандин имандин бинеяр. Часть 2

Сад Аллагьдихъ инанмиш хьун

Сад Аллагьдихъ инанмиш хьун - им Адаз хас къад чарасуз ери, къад гьич тежер ва сад мумкин тир лишан авайди чун инанмиш хьун лазим я. И ерийриз сифетар лугьуда, абур гьар са мусурмандиз чир хьун чарасуз я.

Аллагьдиз хас чарасуз сифетар:

1. Аваз хьун;

2. Эвел тахьун;

3. Эхир тахьун; 

4. Садазни ухшар тахьун;

5. Садалайни аслу тахьун;

6. Сад хьун;

7. Виридалайни къудратлу хьун;

8. Вири хийирни-шийир Адаз кIан хьайила арадал атун;

9. Вири чир хьун;

10. Уьмуьр;

11. Рахун;

12. Вири шейэрин ван атун;

13. Вири акун;

14. Вири алакьзавайди;

15. КIандатIа хийир, кIандатIа шийир гузвайди;

16. Вири чизвайди;

17. Чан алайди;

18. Рахазвайди;

19. Вири шейэрин ван къвезвайди;

20. Вири аквазвайди.

Гьакъикъи динди ва акьулди Аллагьдихъ галаз алакъалу вири сифетар тестикьарна кIанда. Винидихъ тIвар кьур ерийрилай гъейри Аллагьдихъ 99 гуьзел тIвар ава. Абурал алава яз, Аллагьдихъ анжах Вичиз хабар авай гьисабиз тежедай кьван генани чIехи тIварар ва ерияр ава.

Аллагьдиз хас тушир гьич виже текъвер сифетар: винидихъ тIвар кьур сифетриз акси 20 сифет. Аллагьдихъ аваз хьун мумкин тир сифет: Вичиз кIан хьайитIа са кар авун ва Вичиз такIан хьайитIа а кар тавун. Месела, кIан хьайитIа суваб гуда, такIан хьайитIа азаб гуда. ГьакIни, вичиз кIан хьайитIа инсандиз велед гуда, такIан хьайитIа гудач.

Вахтунин къене Аллагь дегиш жезвач, я Ам патал вахтни дегиш жезвач. Вахтар Халикьди Вичи дегишарзава (вахт чаз хас я). Эгер «Аллагь гьинава?» лагьайтIа, Ам цаварал ва я маса чкада ава лугьун къадагъа я. Вучиз лагьайтIа Аллагь чун хьиз чкадихъ муьгьтеж туш, Адаз бедендин паяр авач, Ам са куьнизни ухшар туш. Аллагь ахьтин кутуг тавур лишанрикай михьи я (Субгьаналлагь).

Аллагь аваз хьунин субутвал и ачух, къайдада аваз кIвалахзавай, тажуб жедай дуьнья ва Адан яратмишунар хьун я. Чаз малум тирвал, телевизордиз, машиндиз ва я маса шейиниз ам тIуькIуьрзавай устIар герек я. Цавар, чилер, рагъ, гъетер, вацIар, инсанар ва маса яратмишунар, атомдилай башламишна галактикайрал кьван вири шейэри Халикь авайди шагьидвалзава. Ибур вири Аллагь галачиз чеб-чпелай арадал къведай шейэр туш. Гьелбетда, Аллагьди абур халкьнава ва виридал гуьзчивал тухузва.

Ахьтин аламатар акурдалай кьулухъ Аллагьдихъ инанмиш тушир инсан, вичин акьул инкарзавай ахмакьбурукай я.

 Кат1 ама...

Предыдущая глава

Лезгинский исламский просветительский портал