Мусурмандин имандин бинеяр. Часть 5

Пайгъамбаррихъ инанмиш хьун

Пайгъамбарар - ибур Аллагьдиз кIани, гьуьрметлу лукIар я. Абур инсанриз дуьз рекьиз эверун патал Халикьди ракъурна. Абурукай сад лагьайди Адам пайгъамбар (Адал салам хьуй, эхиримжиди – Мугьаммад Пайгъамбар (Аллагьдин салатни салам хьуй адал) я. Вилик девирра хьайи пайгъамбарар, тайин тир вахтунда тайин тир халкьариз рекье тунвай. Амма Мугьаммад Пайгъамбар (Аллагьдин салатни салам хьуй адал) вири инсаниятдиз ва жинерриз рекье тунвай. Ам пайгъамбаррин цIиргъ акьалтIарзавай эхиримжи гьалкъа я.

 

Пак тир Къуръанда 25 пайгъамбардин тIвар кьунва. Мусурмандиз абурун тIварар чир хьана кIанда ва инанмиш хьун чарасуз я: Адам, Идрис, Нугь, Гьуд, Салигь, Ибрагьим, ЛутI, Исмаил, Исгьакъ, Якъуб, Юсуф, Шу’айб, Аюб, Зулкифли, Муса, Гьарун, Сулейман, Давуд, Ильяс, Альяса’, Юнус, Закария, Яхья, Иса, Мугьаммад, Аллагьдин патай салаватар ва саламар абуруз. Пайгъамбаррин арада расулар ва набияр тафаватлу жезва.

Расулар - ибур вири инсаниятдикай хкянавай, абурув Аллагьдин буйругъар ва ачух сирер агакьарзавай лукIар я.

Набияр – ибурни инсаниятдикай хкянавай, Аллагьди ачухарнавай сирер агакьарнавай амма дин инсанрал агакьарунин буйругъ таганвай лукIар я. Пайгъамбаррин кьадар анжах тек са Аллагьдиз чизва. Алимри лугьузвайвал, абурун кьадар 124 агъзурдалай гзаф я. Абурукай анжах 313 расулар тир. Пайгъамбарвилин гьакъикъивал субутзавайди, абурухъ авай Аллагьди ганвай аламатар (муъжизатар) ва чпиз хас тир ерияр я. Аллагьди пайгъамбарриз тамам, чарасуз абуруз хас ерияр ганва: намуслувал, гьар са шейина гьахълувал, лап тамам гунагьсузвал, тамам акьул, Аллагьдин патай ачухнавай сирер (чирвилер) атун ва абур инсанрал агакьарун, пайгъамбарар анжах итимар жезва ва абур лукIвиликай азадбур я. Винидихъ къалурнавай ерийриз аксибур пайгъамбарриз гьич хас туш, абур ахьтин лишанрикай михьи я. Дишегьлияр пайгъамбарар гьич жедач. Ибурал алава яз пайгъамбарриз, адетдин инсанриз кутугай хьтин лишанарни хас я. Месела, фу тIуьн ва яд хъун, ксун, эвленмиш хьун, хъел атун (анжах Аллагь патал), галат хьун, кьиникь ва масабур. Амма абурун дережа агъадиз вегьезвай азарар абурук гьич акатзавач.

Пайгъамбарар Аллагьдиз виридалайни багьа яратмишунар я. Абурун арада расулриз гзаф гьуьрмет ава. Расулрикай виридалайни къиметлубур: Мугьаммад , Ибрагьим , Муса , Иса  ва Нугь Аллагьдин патай салаватар ва саламар абуруз. Аллагь-Таалади яратмишнавайбурукай виридалайни къиметлуди ва Адаз багьади Мугьаммад Пайгъамбар (Аллагьдин салатни салам хьуй адал).

 

 

 

 

 

 

Лезгинский исламский просветительский портал