Ачух цавун кIаник ифтIарар

Шукур хьуй Сад Аллагьдиз, азиз Рамазандин варз алукьнава ва дуьньядин мусурманри сивер хуьз башламишнава. Экуьнин капI жедалди тIуьн незва ва яд хъвазва, ахпа сагъ юкъуз, гьатта гъетрен капI жедалди, са шейни дадмиш завач. Гъетрен кпIунин азан гайила, мусурманриз кьве шадвал жезва: сад сив хвена Аллагьдин  буйругъ кьилиз акъудна лагьана и дуьньяда шадвал ва муькуьдини агъа дуьньяда Аллагьдихъ  галаз гуьруьш жедай юкъуз жедай шадвал. 
Аллагьдиз  шукур авуна мусурманри сивер хурмаяр тIуьна, яд хъвана ва я маса гьалал тир са шейиналди хкудзава, жемятдин капI ийизва, ахпа тIуьнив эгечIзава. Сив хкуддайла незвай тIуьниз араб чIалалди «ифтIар» лугьузва. Ингье, эхиримжи са шумуд йис я Дагъустандин мискIинра ачух ифтIарар тешкил ийиз. Ихьтин ифтIардиз кIандай мусурмандиз къведай ихтияр ава. МискIинрин гьаятра суфраяр ахъайзава, йикъан къене вичин нефс хвейи касдиз инал тухдалди, вичин рикIиз кIани тIуьн недай мумкинвал ава. И хъсан адетдикай мусурманриз еке менфят ава.
Инал абуру чпин мусурман стхайрихъ галаз, чинал хъвер алаз сивер хкудзава, сада-садаз хвейи сив мубарак ийизва, ам Аллагьди кьабулрай лугьуз дуьаяр ийизва. 
Мадни ифтIарар тешкилзавай ва садакьаяр гузвай инсанриз лап зурба суваб жезва. ГьикI хьи, Мугьаммад Пайгъамбарди (Аллагьдин салатни  салам  хьуй адал) лагьанва: «Сив кьурдаз тIуьн гайи касдиз гьа сив кьурдаз кьван суваб жеда, гьа са вахтунда сив кьурдан суваб гьич тIимил жедач». 
Ихьтин ифтIарар ийидай хъсан адет гзаф араб гьукуматрани ава, гьатта чи Россиядин шегьеррани. Россиядин шегьерра кьиле физвай ифтIаррал мусурман миллетри чпин милли тIуьнар гьазурна гъизва, месела, дагъустанвийри як кьилел алай хинкIар, узбекри чпин аш дадмишун теклифзава. Мад лугьуз кIанзава хьи, йисйисандавай Рамазандин вацран къене анжах йифиз кIвалахзавай ресторанрин кьадар артух жезва. 
И ресторанрин ракIарар гъетрен кпIунин азан гайила ачухзава ва экуьнин кпIунин азан гайила агал хъийизва. Муъминриз чпин кIани тIуьнар тIуьна сив хкуддай ва сив кьадай хъсан мумкинвал ава. И кардини, гьелбетда, рикI пара шадарзава. 
Рамазандин варз – им ифтIарар ийиз сад-садан мугьманриз фидай варзни я. Гзафбуру чпин мукьва-кьилийриз, дустариз ва муъмин стхайриз сив хкудиз мугьмандиз эверзава. Са гафуналди, Рамазан варз мусурманрин еке сувар я. Къуй Аллагьди  вири мусурманри кьазвай сивер, ийизвай капI-тIеат ва гузвай садакьаяр кьабулрай! Амин.
Лезгинский исламский просветительский портал