Аллагьдихъай чуьнуьх жез алакьдач

Багъдад шегьерда шейх Джунайд яшамиш жезвай ва адаз гзаф муатааллимар (Исламдин илим чирзавай ученикар) авай. Муаллимдиз вичин вири мутааллимар кIандай, амма Абдуллагь адаз виридалайни гзаф кIандай ва адаз гзаф гьуьрметни ийидай.

 Са сеферда тарсунилай кьулухъ абурукай бязибур кIватI хьана муаллимдин кьилив атана жузуна: - Гьуьрметлу муаллим, чун са шейинин гъавурда акьазвач. Вучиз ваз Абдуллагь чалай гзаф кIанзава ва адаз гзаф гьуьрмет ийизва? 

Амни чун хьтин мутааллим я. Ам тарсар чириз чалишмиш жезва, бес чунни гуьгъуьна амукьзавач хьи. Чи арада адалайни хъсан мутааллимарни хьун мумкин я.

Шейх Джунайда абуруз лагьана: - И суалдин жаваб квез куь вилералди аквада ва япаралди ван къведа, зи мутааллимар! Ачух жавабдин ван атун тавурла рикI ханвай мутааллимар кIвалериз хъфена. Са шумуд гьафтедилай чпи муаллимдиз гайи суал мутааллимрин рикIелай алатнавай. Гьа икI са юкъуз тарсунин гуьгъуьнай вичин мутааллимрихъ элкъвена Джунайда лагьана: - Эй, зи мутааллимар, зи вилерин ишигъ! Заз квез кIвалин кIвалах гуз кIанзава. Къе медреседай хъфейла гьар сада вичиз са верч жагъура ва ам садазни таквадай чкада тукIукI, ахпа ам зи кьилив гъваш.

Пакад юкъуз вири мутааллимар кьилиз акъуднавай кIвалин кIвалахар гваз атана. Анжах Абдуллагьа кIвалин кIвалах тамамарнач. Вири мутааллимриз адакай хъел атана: - Муаллимди гайи тапшуругъ кьилиз акъуд тавуна вун иниз атун вучиз авуна?!

Джунайда адаз суал гана: - Абдуллагь, бес вуна вучиз верч тукIунач? – Багъишламиш, зи рикI алай муаллим, амма Аллагьдиз  зун таквадай гьич са чкани завай жагъуриз хьанач, - жаваб гана ада. - Ихьтин жавабдин ван хьайила Джунайдаз шад хьана ва Абдуллагь къужахда кьуна лагьана: «Эй, зи мутааллимар, вучиз за адаз виридалайни гзаф гьуьрмет ийизватIа гила квез чир хьанани? Къуръан ва гьадисар чирунихъ галаз адан рикIе авай Аллагьдин  гьакъиндай муьгьуьббатни артух жезва». Гуьрчег парталар алукIун, инсанриз жув иер къалурун регьят я, амма тарифар авуниз лайихлуди неинки вичин винел пад, гьакIни къене пад хуьзвай мусурман я. Имам аш-Шафииди  виридалайни хъсан пуд амалдикай хабар гана: «Кесибвиле авайла гъилин ачухвал, хелветда (кьилди) авайла гунагьар тавун, инсанриз кичIезвай залум касдиз лугьузвай гьахъ ачухзавай гаф». Аллагь-Таалади Вичиз вири шейэр аквазвайди, ван къвезвайди ва чизвайди чаз хабар ганва. Гьикьван чинеба авунвай амал хьайитIани, ам Аллагьдикай  чуьнуьхиз жедач.

Аллагь-Таалади Къуръанда лагьанва (мана): «Чилерални цаварал алай шейэрикай Аллагьдиз  хабар авайди ваз чизвачни? Эгер пуд касди чинеба ихтилат ийиз хьайитIа, Ам кьуд лагьайди жезва, вад касди ийиз хьайитIа, Ам ругуд лагьайди жезва (яни Адаз абуру лугьузвай гафарин ван къвезва)»

(«Аль-Мужадаля» сура, 7-аят).

Маса аятда лагьанва (мана): «Абур инсанрикай чуьнуьх жезва, амма Аллагьдикай чуьнуьх жезвач, гьикI хьи, ийифиз пис гафар лугьудайлани Адаз абурун ван къвезва» 

(«Ан-Ниса» сура, 108-аят). 

 

Лезгинский исламский просветительский портал