Аллагьдихъай кичIе тир гьаким

Сирийвийрин гьал-агьвал гьикI ятIа ахтармишун патал, халиф Умар (Аллагь рази хьуй) Сириядиз атана. Ам Гьумс шегьерда акъвазайла, и шегьердин агьалияр адаз хвашкалди лугьуз атана. Умара (Аллагь рази хьуй)  абурувай хабар кьуна:

-  Куь гьаким гьихьтинди я?

Шегьерэгьлийри чпин гьаким Саид ибн Амиралай (Аллагь рази хьуй)  шикаятар ийиз башламишна. Абуру чпин гьакимдин кьуд пис еридикай лагьана, а ерияр чебни сад-садалай нагьакьанбур тир. 

Куьн квелай рази туш, -  шегьерэгьлийривай хабар кьуна Умара (Аллагь рази хьуй).

- Ам югъ нисини тахьанмаз халкьдин юкьваз экъечIдайди туш.

- И кардикай на вуч лугьузва, я, Саид (Аллагь рази хьуй), - хабар кьуна Умара (Аллагь рази хьуй).

Са тIимил кисна акъвазайдалай кьулухъ, Саида (Аллагь рази хьуй) жаваб гана: «Аллагьдал  кьин хьурай, заз и кардикай лугьуз кIанзавайди тушир. Амма гила маса чара авачирвиляй за сир ачухда. Зи хизандиз къуллугъдай къаравуш авач, гьаниз килигна зун экуьнахъ фад къарагъзава, тини ишинзава, са кьадар вахт арадай фейила, фу чразва, ахпа дастамаз къачуна ва халкьдин юкьваз экъечIзава». Идалай кьулухъ, Умара (Аллагь рази хьуй)  шегьерэгьлийривай мадни хабар кьуна:

 - Куьн мад квелай нарази я?

- Ада йифиз садазни жаваб гузвач, - лагьана шегье- рэгьлийри.

- И кардикай вуна вуч лугьуда, я, Саид (Аллагь рази хьуй)? – хабар кьуна Умара.

- Аллагьдал кьин хьурай, и кардикайни заз лугьуз кIанзавайди тушир. Кар анал ала хьи, за юкъуз жув халкьариз бахшзава, йифиз – Аллагьдиз.
 Умар (Аллагь рази хьуй)  мадни шегьерэгьлийрихъ элкъвена:
- Куьн мад квелай нарази я?

- Вацра са сеферда ам чи вилик ерли экъечIзавач, - лагьана абуру.

 - Вуна и кардикай вуч лугьуда, Саид (Аллагь рази хьуй)? – хабар кьуна Умара (Аллагь рази хьуй).

 - Я, инанмишбурун халиф, захъ жувал алай парталдилай гъейри, мад алукIдай са затIни авач. Вацра са сеферда за парталар чуьхуьзва ва абур кьурадалди гуьзлемишзава ва нянихъай зун халкьдин вилик экъечIзава.

 – Мад квелай нарази я? – тикрарна суал Умара (Аллагь рази хьуй). - Гагь-гагь ам экуьнлай няналди вич-вичикай хкатнавай гьалдиз къвезва ва ада межлисра иштиракзавач, - лагьана шегьерэгьлийри.

- ИкI вучиз я, Саид (Аллагь рази хьуй)?- хабар кьуна Умар асгьабди (Аллагь рази хьуй).

- Заз, жув мажуси тирла, Хубайбадин чандиз къаст авур жуьре акунай, жаллатIри адан бедендай тикеяр акъудиз, адавай хабар кьазвай: «Ваз кIандайни ви чкадал Мугьаммад (Аллагьдин салатни  салам  хьуй адал) хьанайтIа?». Ада икI жаваб хгузвай: «Кьин хьурай Аллагьдал, заз, жуван чкадал Мугьаммад (Аллагьдин салатни  салам  хьуй адал) куь гъиле туналди, къутармиш жез ва жуван багърийрин арадиз хъфиз кIанзавач, гьатта куьне зи чанда цацар туртIани». Завай адаз куьмек тахьай а югъ рикIел хквез, зун жув-жувакай хкатзава, вучиз лагьайтIа заз а кар (Хубайбадиз куьмек тавун) Аллагьди  жуваз багъиш тийиз кичIезва. Вири суалар гайидалай гуьгъуьниз, Умара (Аллагь рази хьуй)  лагьана: «Шукур хьурай Аллагьдиз, Саидакай (Аллагь рази хьуй) зи фикир дегиш тавур! (Яни Умар асгьабди (Аллагь рази хьуй) адакай хъсан фикирзавай ва гьакI язни хьана)».

Лезгинский исламский просветительский портал