Насигьатдин тарсар

Бязи вахтара инсандиз дуьз рекьел атун патал са гьадис, аят ва я михьи инсандин гаф бес жезва. Кьилинди и карда Аллагьди  адан рикI дуьз патахъ ачухун я. Гьавиляй, чна Аллагьдивай  чи рикIера михьи дин тун гьамиша тIалабда.

1. Аллагь-Таалади пак Къуръанда лагьанва (мана):

«Куьне Заз ибадат ва диде-бубадиз, мукьвабуруз, кесибриз, къуншийриз, рекьин юлдашриз гьуьрмет ая».

2. Жабраил малаик (алейгьи салям) атана чи Пайгъамбардиз (Аллагьдин салатни  салам  хьуй адал), къуншийриз гьуьрмет ая лагьанай. Пайгъамбардини (Аллагьдин салатни  салам  хьуй адал), са асгьабдиз лагьана: «Эй Абу Зарр, як пайдайла, къуншийрин кьадардиз килигна пая».

3. Аллагьдихъ  ва Къияматдин йикъахъ инанмиш касди къуншидиз писвал тавурай. Аллагьдихъ ва Къияматдин йикъахъ инанмиш касди мугьман хъсандиз кьабулрай.

4. Айишади (Аллагь рази хьуй)  Пайгъамбардивай (Аллагьдин салатни  салам  хьуй адал), хабар кьуна: «Я Аллагьдин Расул (Аллагьдин салатни  салам  хьуй адал), за гьи къуншидиз эвел садакьа гун лазим я?» Расулюллагьди (Аллагьдин салатни  салам  хьуй адал), жаваб гана: «Гьи къунши мукьув гватIа, гьадаз».

5. Пайгъамбарди (Аллагьдин салатни  салам  хьуй адал), лагьана: «Юлдашрикай ва къуншийрикай виридалайни хъсанди ам я хьи, вичин юлдашдиз ва къуншидиз гзаф гьуьрмет ийизвайди».

6. Мад гьадисда лагьанва: «Къуншияр пуд жуьре ава: сад лагьайди, къунши мукьвади ва  мусурман. Идаз пуд гьахъ ава; кьвед лагьайди, къунши ва мусурман. Идаз кьве гьахъ ава; пуд лагьайди, имансуз къунши. Идаз са гьахъ ава».

7. Мад лагьанва: «Пис къунши кицIелайни пис я».

8. Са касди лагьана: «Я Аллагьдин Расул (Аллагьдин салатни  салам  хьуй адал),, за къуншидиз гьикьван хъсанвал авуртIани ам рази жезвач, закай хъел ава. За вуч авун лазим я?» Расулюллагьди (Аллагьдин салатни  салам  хьуй адал), жаваб гана: «Вуна лугьузвайвал ятIа, Къияматдин юкъуз адан чин ва кIуф кудай руьхъведа твада».

9. Са касди Пайгъамбардивай (Аллагьдин салатни  салам  хьуй адал), хабар кьуна: «Аллагь-Тааладиз виридалайни хуш кар гьим я?» Расулюллагьди (Аллагьдин салатни  салам  хьуй адал), жаваб гана: «Вахтунда авур капI». Ада мад суал хгана: «Ахпа гьим?» «Ахпа диде-бубадиз гьуьрмет авун, гьич «уф» лугьун тавуна», - жаваб хгана Пайгъамбарди (Аллагьдин салатни  салам  хьуй адал),. Ада мад жузуна: «Ахпа гьим?» Расулуллагьди (Аллагьдин салатни  салам  хьуй адал), жаваб гана: «Ахпа Аллагь-Таала патал халис гъазават чIугун».

10. Абу Бакр асгьабди (Аллагь рази хьуй) лагьана: «Мукьва-кьилийрин арада къал гьатунни таму цIай кьун сад я». Яни гьакьван зарар авай кIвалах я ам.

11. Абдул-Къадир (Аллагь рази хьуй)  Гиланиди лагьана: «Мусурмандин кефи хун Кябе чукIурунилайни еке гунагь я».

Лезгинский исламский просветительский портал