Хъсан къилих

Пайгъамбардивай  (Аллагьдин салатни салам хьуй адал), мусурман  вуж кас я лагьана хабар кьурла, ада жаваб гана: «Мусурман ам я хьи, вичикай ва вичин мецикай масадбуруз зиян тагузвайди». 
 
Чаз чешне яз, и дуьнядал Аллагь-Таалади Мугьаммад Пайгъамбар (Аллагьдин салатни салам хьуй адал),  ракъурна ва ада вичин уьмуьрдин къене авунвай гьар са амал чун патал тарс  я. Адалай хъсан муаллим чаз авач. Вучиз лагьайтIа, Аллагьди  чаз гьадан геле аваз фин эмирнава. Пайгъамбардини (Аллагьдин салатни салам хьуй адал), лагьана: «Аллагьди  зун хъсан къилихар тамамарун патал ракъурнва».  
Аллагьдин  Расулдиз зурба, иер къилих авай. Пайгъамбардин (Аллагьдин салатни салам хьуй адал), девирда Ислам диндал атанвай кьван инсанрин гзаф пай адан иер, пак, хъсан къилихдиз килигна атана. Вичин къилихар Пайгъамбардин (Аллагьдин салатни салам хьуй адал), къилихриз ухшар жедайвал гьар са мусурман алахъна кIанда. Пайгъамбарди (Аллагьдин салатни салам хьуй адал),  лагьана: «Къияматдин юкъуз заз квекай виридалайни гзаф кIаниди ва заз мукьув жедайди хъсан къилих авайди я». Хъсан къилих хуьнихъ еке сувабни ава. Са касди Пайгъамбардивай (Аллагьдин салатни салам хьуй адал), хабар кьуна: «Я Расуляллагь, муъминрикай виридалайни хъсанди гьим я?» Ада (Аллагьдин салатни салам хьуй адал),  жаваб гана: «Виридлайни хъсан къилих авайди».  Аллагь- Таалади иман халкь авурла, ада Аллагьдивай  тIалабна: «Я Рабби, зун къуватлу ая!» Аллагьдини  ам хъсан къилихдин ва жуматрлувилин куьмекдалди къуватлу авуна. Ахпа Аллагь-Таалади имансузвал халкьна,  адани Аллагьдивай  тIалабна: «Я Рабби, зун къуватлу ая!» Аллагьдини  имансузвал шкьакьвилин ва пис къилихдин куьмекдалди къуватлу авуна. Им лагьай чIал я хьи, мягькем иман авай касдихъ хъсан къилихни жеда, имансуз инсандихъ - пис къилих. Пайгъамбардин (Аллагьдин салатни салам хьуй адал),  патав са кас атана лагьана: «Я Расуляллагь, заз веси ая ман!» Ада (Аллагьдин салатни салам хьуй адал),  лагьана: «Вун гьина аваз хьайитIани Аллагьдихъай  кичIе хьухь». Мадни веси ая, лагьана а касди. Пайгъамбардини (Аллагьдин салатни салам хьуй адал), лагьана: «ЧIуру кIвалах авурдалай кьулухъ ам михьи хъийдай хъсан амал ийиз чалашмиш хьухь». Мадни веси ая, лагьана а касди. Пайгъамбарди (Аллагьдин салатни салам хьуй адал),  лагьана: «Инсанрихъ галаз хъсан алакъайра хьухь».
Са юкъуз Фузайла (Аллагь рази хуьй) Пайгъамбардивай (Аллагьдин салатни салам хьуй адал), хабар кьуна: «Я Расуляллагь, флан касди юкъуз сувабдин сивер хуьзва ва йифди кпIар ийизва, амма адан къилих лап чIуруди я, ада вичин къуншийриз мецелди зиян гузва. Ихьтин инсандин гьакъиндай вуч лугьуз жеда?» Пайгъамбарди (Аллагьдин салатни салам хьуй адал), жаваб гана: «А касдикай са хийирни авач, ам Жегьеннемдин эгьлийрикай я». Гьелбетда, жуван хиве авай капI тавуна за хъсан къилих хуьда лугьуникай са хийирни жедач. Вучиз лагьайтIа, капI тийизвай инсандин хъсан кIвалахар Аллагьди  кьабул тавунни мумкин я. Ибн Умара (Аллагь рази хьуй) лагьана: «Пайгъамбарди (Аллагьдин салатни салам хьуй адал), гзафни-гзаф Аллагьдивай  хъсан къилих ва саламатвал тIалабдай». Гьавиляй, гьуьрметлу динэгьлияр, чнани Аллагьдивай  мукьвал-мукьвал хъсан къилих тIалабна кIанда.  
 
 
 
 
 
 
 
 
Лезгинский исламский просветительский портал