Мусурман хизан ислягь хьурай! Часть 2

Гъуьлуьн вилик папан буржияр:

1. Гъуьлуьз муьтIуьгъ хьун.

2. Месин буржи.

3. Гъуьлуьн ягь, намус, кIвал ва девлет хуьн.

4. Гъуьлуьхъ галаз хъсан алакъаяр хуьн. Гъуьл нарази хьайитIа, адавай гьасятда багъишламишун тIалабна кIанда. Гъуьл нарази яз ксузвай папаз малаикри йифди пис дуьа ийизва. Винидихъ гъайи гьадисда лагьанвайвал, ам нарази яз паб кечмиш хьайитIа, ам жегьеннемдиз фин мумкин я. 

Чаз чун мус рекьидатIа чин тийизвайвиляй гъил къачун тIалабиз гьерекатна кIанда. Ам Аллагьди ви чIехиди яз эцигнавай кас я, гьавиляй адан вилик кьил агъузна багъишламишун тIалабиз регъуь ва такабурлу жемир. Папаз женнет къазанмишун гзаф регьят я! Амма, гьайиф хьи, абуру и регьят мумкинвал ишлемишзавач. Вучиз чна икI лугьузва. Вучиз лагьайтIа, Пайгъамбар e цаварал хкажайла (ми’раж) адаз жегьеннемда итимрилай гзаф дишегьлияр аваз акуна. Дишегьли шейтIандиз алдатмишариз регьят я, гьа са вахтунда адаз Аллагьди женнет къазанмишдай регьят рехъни къалурнава. Аллагь-Тааладиз ва гъуьлуьз муьтIуьгъ хьухь (гьалал кIвалахра) ва вичин чка женнет я лагьанва. Пайгъамбардин (салам ва салават хьуй адал) гьадисда лагьанва: «Вичелай гъуьл рази яз и дуьньядилай фейи дишегьлидиз женнетдиз гьи ракIарай кIандатIа фидай ихтияр гуда». 

Къейд: гъуьлуьз муьтIуьгъ хьун лугьудайла, шариатдихъ галаз кьадай кIвалахра адаз муьтIуьгъ хьун фикирда ава. Месела, гъуьлуь папаз капI ийимир лугьуз хьайитIа, адавай итимдиз муьтIуьгъ тахьайтIа жезва, вучиз лагьайтIа гьа и гафаралди гъуьл вич ЧIехи Аллагьдиз аси жезва. Папа адахъ галаз гьуьжетар авуна кIандач, ширин мецелди ихтияр гун тIалабна кIанда. Аллагьди  ая лагьанвай кIвалах ада мийир лугьузва. Гьадисда лагьанва: «Халикьдиз аси хьана махлукьдиз муьтIуьгъ жедай ихтияр авач». Гьелбетда, гъуьлуь сифте вичихъ галаз кьадай паб ва рушани вичихъ галаз кьадай гъуьл хкяна кIанда. Динди чаз чирзавайвал диндар, Аллагьдихъай  кичIеди. Гъуьл паб галачиз ва паб гъуьл галачиз тамам жезвач. Абуру сада-сад тамамарзава. Уьмуьрдин юлдашриз чпин алакъа кIеви авун патал пуд меслят ганва:

1. Сад-садан нукьсанрихъ къекъуьн тавун, анжах хъсан къилихриз фикир гун. Нукьсанар авачир ксар авач. Гьар садахъ абур са жуьрединбур ава. Гьавиляй гъуьлни паб чпи-чпин нукьсанар кIевиз, абур туьхкIуьр хъийиз, яни къилихар хъсанариз алахърай. И карда хьайи са тIимил кьван агалкьунризни баркала гъана, тариф авун лазим я. 

2. Гьар сада вич такабурлудаказ еке дережада аваз кьун тавун. ГъалатI тежезвай кас авач, амма виридалайни хъсанди вичин гъалатI хиве кьуна, ам дуьзар хъийизвайди я.

60 йисан яшда авай са кьуьзуь бубадивай мукьвабуру жузуна: «Ингье куьн начагъ хьанва, квехъ гелкъведай я паб, я велед авач. Са паб гъанайтIа квевай жедачирни?» Кьуьзуьда жаваб гана: «Зун зи уьмуьрдин къене гьич са нукьсанни квачир, вири патарихъай тамам дишегьлидихъ къекъвена». «Квез ахьтинди жагъаначни?», - суал хгана абуру. «Эхь, сад жагъана, амма адазни заз хьиз нукьсан квачир гъуьл кIанзавай. Гьавиляй ам заз пабвилиз атанач», - жаваб хгана вилерал нагъв алаз кьуьзуь бубади.

3. Гъуьлуь вичин папакай ва папа гъуьлуькай садазни пис ва гьатта хъсан ихтилатар ахъай тавун. Вучиз лагьайтIа хъсанбур ахъаяйтIа, абурал пехил хьун мумкин я, писбур ахъаяйтIа - фитне авун, куь арада къал тун. ГьакIни чарабуру абурукай лугьузвай пис гафариз фикир тагун. Инсанар пехилвилин начагъвилел азарлу я, кIвале къал авайбуруз секинзавай кIвалерани къал таз кIан жезва, чара хьанвайбуруз масабурни чеб хьиз чара хьана кIан жезва. Виридаз ихьтин пис ниятар авач, амма абрун кьадарни тIимил туш. Аллагьди вичи хуьрай ахьтинбурукай. Гьуьрметлубур, куьне сада-садаз къимет це, гьуьрмет ая. Хатур хуналди куь муьгьуьббатдин экв хкадармир. Къуй гьар са мусурман хизан ислягь-вилелди яшамиш хьурай! Амин.

Предыдущая глава

Лезгинский исламский просветительский портал