Мехъерихъ галаз алакъалу 6 Сунна

Гьар садаз вичин хизан чешнелуди хьана кIанзава. А мурад кьилиз акъатун патал чна агъадихъ гъанвай Суннайрал, яни Мугьаммад Пайгъамбарди (Аллагьдин салатни салам хьуй адал) къалурнавай меслятрал амал авун лазим я:
 
1. Мехъер кьиле тухузвай чка ва тухузвай къайда гьалалдин асул бинедихъ галаз кьуна кIанда. Мехъерин финиф вири рази жедайвал тухвана кIанда, гьа са вахтунда гьар са гьарам шейиникай магьрум хьун лазим я.
 
2. Мехъерин макьсад – им итим ва дишегьли къанундихъ галаз кьур некягь эцигзавайдакай инсанар хабардар авун я. ИкI, месела, гьадисрикай сада лагьанва: «Некягь эцигнавай лишан, адан гьакъиндай хабардар авун я» (Насаи, Некягь, 72).
 
3. Мехъерин тIуьн гун. Лугьуда хьи, Аллагьдин Расулдиз (Аллагьдин салатни салам хьуй адал) Авфан хва Абдурагьманал, Аллагь рази хьурай вичелай, заферандин гелер акурла адавай жузуна: «Им вуч я?» Абдурагьмана, Аллагь рази хьурай вичелай, лагьана: «За магьрдин еринда дишегьлидиз тайин тир кьадар къизил гана ва адал эвленмиш хьана». Аллагьдин Расулди (Аллагьдин салатни салам хьуй адал) лагьана: «Къуй Аллагьди куь некягь бахтлуди авурай. Анжах вуна са гьерекай хьайитIани мехъеррин тIуьн гьазурна кIанда» (Муслим, Тирмизи, Насаи, Некягь, 74,75). 
Анас ибн Малика, Аллагь рази хьурай вичелай, ахъайзава: «Пайгъамбардин (Аллагьдин салатни салам хьуй адал) са мехъерик зи дидеди тIуьн гьазурнавай. Аллагьдин Расулди (Аллагьдин салатни салам хьуй адал)заз лагьана: «Ам тухвана суфрадал эциг ва фена фландаз, фландаз ва фландаз ва жуван рекье гьалтай гьар садаз теклифа» ва генани заз гзаф инсанрин тIварар кьуна. Заз Пайгъамбарди (Аллагьдин салатни салам хьуй адал) тIварар кьур инсанриз за виридаз эверна ва рекье гьалтайбурузни теклифна. Вири саки пуд виш кас кIватI хьанвай. Аллагьдин Расулди (Аллагьдин салатни салам хьуй адал) лагьана: «Къуй абур цIуд-цIуд кас гьахьрай ва тIуьрай». Сифте дестеди тух жедалди тIуьна ахпа абур экъечIна. Ахпа тух жедалди къвезвай дестеди тIуьна, адалай кьулухъ гуьгъуьнал алайда, гьа икI, та теклифайбуру вирида тух жедалди недалди. Адалай кьулухъ Аллагьдин Расулди (Аллагьдин салатни салам хьуй адал) лагьана: «Анас, суфра михьи хъия». За суфрадал аламай тIуьн кIватI хъувуна, амма заз чирвиляй тIуьнин кьадар за гъайидалай артух хьанвай» (Насаи, 84, Муслим, 94; Бухари 4/234). 
Сабит аль-Буханиди, Аллагь рази хьурай вичелай, ахъайзава: «Аллагьдин Расул (Аллагьдин салатни салам хьуй адал) Зайнабал, Аллагь рази хьурай вичелай, эвленмиш жедайла, ада мехъериз гьихьтин тIуьн ганвай?» Ада жаваб гана: «Аллагьдин Расулди (Аллагьдин салатни салам хьуй адал) вичин асгьабриз тух жедалди якни фу гана» (Муслим, Некягь, 91).
 
Катl ама...
Источник : Ас Салам
 
Лезгинский исламский просветительский портал