Мукьвавилин араяр мягькемара

родственные связи в исламе

Мукьвавилин араяр атIун Исламда еке гунагьрикай яз гьисабзава. Чпин аялрин тапан къулайвилер патал чи инсанри и гунагь регьятдиз ийизва, гьатта хайи стхани къерехда тазва. Са гьуьжетни алач хьи, мукьвавилилин алакъаяр мегькемаруниз мажбур я, гьикI хьи Аллагьди  пак Къуранда лугьузва: «Вичин  тIварцIелди куьне це лугьуз минетзавай Аллагьдихъай  ва мукьвавилин алакъаяр атIуникай кичIе хьухь» («ан-Ниса» сурадин 1-аят)

. Ина Аллагьди  Шариатдик акат тийизвай себебрикди чна мукьвавилин алакъаяр чIур тавуникай лугьузва.

Мукьвавилин алакъаяр мягькемаруник мукьва-кьилияр патал анжах хъсанвал авун, гьам гафаралди ва краралди абур бедбахтвилерикай хуьн, патав фин акатзава. Мукьвавилин араяр атIун им абур патал писвал авун, къал тун, дуьньядин месэлаяр себеб яз сад-садахъ галаз рахун тавун жезва. Мугьаммад (Аллагьдин салатни  салам  хьуй адал)  Пайгъамбарди вичихъ инанмиш хьанвайбурухъ элкъвена лагьанай: «Мусурманар, мукьвавилин алакъаяр хуьх, гьакъикъатдани ида уьмуьр яргъи ва ризкьи артух ийизва».

Мукьвабурухъ галаз араяр мягькемарун Аллагьдихъ  галаз алакъаяр мягькемарун жезва, гьикIхьи Пайгъамбардин (Аллагьдин салатни  салам  хьуй адал) гьадисда лагьанва: «Халикьди  лугьузва: «Зун милайимди я, За мукьвавилин алакъаяр арадал гъанва ва адаз Жуван тайифадай тIвар ганва. Ни мукьвабурухъ галаз алакъаяр хвейиитIа, За абурухъ галазни алакъа хуьда ва ни мукьвабурухъ галаз араяр чIурайтIа, Зани абурухъ галаз алакъаяр чIурда» (ТIабарани).

Мукьвавилин алакъаяр хуьн – им Женнетдиз физвай рехъ я. Абу Аюб ал-Ансариди агакьарнавай гьадисда са касди Пайгъамбардин (Аллагьдин салатни  салам  хьуй адал)патав атана тIалабзава: «Женнетдиз акъуддай крарикай лагь» Пайгъамбарди жаваб гана: «Аллагьдиз икрама, Адаз юлдаш хас ийимир, капIая, закат це ва мукьвавилин алакъаяр мягькемара» (Бухари).

 Мукьвавилин алакъаяр атIузвайди Женнетдиз гьахьдач. Аллагьдин Пайгъамбарди (Аллагьдин салатни  салам  хьуй адал) лагьанай: «АтIузвайди Женнетдиз къведач» (Бухари, № 5984). Суфьян ибн Уяйна лагьанай: «“АтIузвайди”  гаф «мукьвабурухъ галаз алакъаяр» манада ишлемишнава» («Фатгьуль Бари»).

Халикьди лугьузва (мана): «Аллагьдихъ галаз икьрар кутIунна, ахпа ам чIурайла ва чилел намуссуз крар (агъун тавуникди, гунагьар авуникди) чкIурайла абур лянетламишзава (пай гайидалай кьулухъ) ва лап четин шартIар теснифзава» («Ра’д» сурадин 25-аят). Пайгъамбардин (Аллагьдин салатни  салам  хьуй адал)муькуь гьадисда лугьузва: «Мукьвавилин алакъаяр чIурзавай ксар авай халкьариз Аллагьди шафакъат гудач» (Агьмад, Абу Нуайм).

Мукьвавилин алакъаяр чIурзавайбурун хъсан крар кьабулзавач. Абу Гьурайради агакьарнавай гьадисда икIкъейдзава: «Инсанрин крар Аллагьдив жуьмя йикъан вилик квай йифиз агакьзава ва мукьвавилин алакъаяр чIурнавай ксаринбур кьабулзавач» (Агьмад).

Мукьвавилин алакъаяр атIуниз Исламда гьихьтин фикир гузватIа чаз винидихъ гъанвай гьадисрайни аятрай аквазва.

Гьуьрметлу стхаярни вахар! Мукьвавилин араяра тIумир, абур мягькемариз алахъ! И кардин гьакъи яз квез Экуь дуьньяда еке паяр гуда, и дуьньядани мукьвабурун куьм екжеда. Пак кхьинра авай гьар са гафунин винел фикира ва гележегда мукьвабурухъ галаз жув гьикI тухудатIа килиг.

Лезгинский исламский просветительский портал