Сабурдин дережаяр

Гьадисда лагьанва: «Сабурлудаказ гунагьрикай ва Аллагьдиз яб тагуникай яргъа хьайи касдиз кIуьд виш дережадин сувабар гьазурнава; сабурлудаказ Аллагьдиз ибадат авур касдиз ругуд виш дережа гьазурнава ва бедбахтвилерал сабурлу хьайидаз - пуд виш дережа». А сувабар тафаватлу хьунин себебарни авазва.

Анжах дуьньядин гьиссерикай яргъа жедай сабур ганвай ксаривай гунагь крар тийиз ва Аллагьдиз ибадат ийиз жеда. Гьамиша Аллагь рикIел гъизвай ксариз а кар регьятарзава ва ам абуруз хуш жезва.

Бедбахтвилер лагьайтIа, мусурманрал, гьакI кяфиррал, чпелай аслу тушиз, кIан хьайитIани ва я тахьайтIани къвезва. Амма гунагь крар авун ва я ибадат ийиз алахъун – дуьз рехъ хкягъунин ихтиярар Аллагьди Вичин лукIварин чпин хиве тунва.

 Маса гьадисда лугьузва: «Аллагьдин Пайгъамбар тир зи ата бубади лагьана: «Я зи хва, эгер Аллагьди гайивилел рази хьайитIа, вакай виридалайни девлетлу кас жеда, эгер Аллагьди хиве тунвай ферзер тамамариз хьайитIа, инсанрикай виридалайни муьтIуьгъди жеда. Я зи хва, Женнетда «бедбахтилерин тар» тIвар алай са тар ава, адан патав дуьньядал алайла бедбахтвилер атай ксар къвезва, абуруз суал ийизвач ва абурун крар алцумзавач».

Лезгинский исламский просветительский портал