Суал-жаваб

Суал: Лайлату-ль-Къадрдин йифиз вуч авуртIа хъсан я?

И йифиз гзаф Къуръан кIелун, зикр авун, купIар тамамарун хъсан я. Мисен ва экуьнин купIар мискIинда жемятдихъ галаз ийида. Мадни Пайгъамбардиз (Аллагьдин салатни  салам  хьуй адал) салаватар кIелда, вирд тамамарда, тасбигь-купIар ийида, дуьаяр артухарда. Пайгъамбарди (Аллагьдин салатни  салам  хьуй адал) ихьтин дуьа кIелун меслят къалурзава: «Аллагьумма, иннака афуввун, тухIиббу-ль-афва фаъфу анни».

 Таржума: «Я Аллагь, Вун гъил къачудайди я, Ваз гъил къачуз кIанда, залайни гъил къачу». ГьакIни и йифиз «Ля илягьа иллаллагь вагьдагьу ля шарика лягьу… кIелун меслят къалурзава»

Сив хуьникай сагъламвилиз хийир ава лугьуда, дуьз яни?

- Алатай, диндиз акси политика тухузвай, йисара гьатта сивер хуьникай инсандин сагъламвилиз зиян ава лугьуз лекцияр кIелзавай. Гила дуьньядин алимри сив хуьнихъ сагъламвал мягькемарунин карда еке метлеб авайди субутарзава. Мусурман уьлквейра алимри сив хуьнихъ авай метлебдикай телевиденидай мукьвал-мукьвал суьгьбетар ийизва. Чи Пайгъамбарди (Аллагьдин салатни  салам  хьуй адал)  лагьайди я: "Сив хуьх, шаксуз, сагълам жеда." Гьа са вахтунда сивер хуьни сагъламвилиз зиян гузвай (уьзуьрлу тир) инсанриз Къуръанда сивер хуьн тийидай ихтияр ганва.

Сив гвайдаз вуч авун иллаки къадагъа я?

- Гьар гьихьтин хьайитIани гьарам крар авун. Гьатта чарасузвал авачиз чуьхуьнни кутугнавач.

Себебар авачиз сивер хуьн тавурдаз гьихьтин жаза къвезва?

- Себеб авачиз сивер хуьн тавурдаз мергьяматлувал (гьатта гуьгъуьнай вири уьмуьрда сивер хвейитIани) ийидач. Чи Пайгъамбарди (Аллагьдин салатни  салам  хьуй адал)  лугьузва: "Зун ахварай кьве малаикди са дагъдин этегдив тухвана. КилигайтIа, гъилер, кIвачер кутIунна, кьве кас михерихъ куьрсарнава. Сиверайни иви физва. За малаикривай хабар кьазва: "Абур вужар я?" Са себебни авачиз сивер хуьникай кьил къакъуднавайбур, - жаваб гана абуру. Инсанар алай чкадал нез, хъваз, Рамазандин варз кваз дакьазвайбуруз мадни еке гунагь я.

Лезгинский исламский просветительский портал