ЯхцIурни цIикьведар гьикI тешкилун лазим я?

ЯхцIурни цIикьведар (яхцIурар) кьиле тухун меслят къалур-завач, идалайни гъейри абур авуниз эвер гузвай делилар чи динда авач, акси яз абур инкар ийизвай гзаф делилар ава. Кьейиди рикIел хкун патал адетар ийидайла, мусурманриз кафиррин адетриз тешпигь жедай ихтияр авач. Малум тирвал, яхцIурар хашпарайрин адет я. Ихьтин межлисриз вири мукьва-кьилийриз, гьатта яргъал шегьеррай ва хуьрерай эвер гузва – абур инжикли ийизва, еке харжар ийизва, гьатта бязи чкайра и югъ къейд ийидайла эрекьарни хъвазва.

 Пайгъамбардин (Аллагьдин салатни  салам  хьуй адал) гьадисда лагьанвайвал, кьейидахъ пуд йикъалай гзаф яс кьадай ихтияр авач. 

Зикирдин, мавлиддин межлис авун ва хьайи суваб кьейидан руьгьдиз багъишун – им шариатди ихтияр ганвай, гьатта меслят къалурзавай амал я. Эгер абур пак йикъара (месела, жуьмя югъ, Ашура…), пак варцара (Рамазан, Рабиу-ль-авваль…) тешкилайтIа генани гзаф суваб жеда. Амма и межлисар авун патал мейит кучудна 7, 40, 52-йикъар тайинарун ва анжах гьа и йикъариз абур авун суннатрик (динди меслят къалурзавай амалар), я ферзерик (динди истемишзавай амалар) акатзавач. Акси яз, инал лагьай хьтин ният аваз 7, 40 ва 52-йикъариз межлис тешкилун Исламди хъсан амал яз гьисабзавач. Эгер зикирдин ва я мавлиддин межлис гьа и йикъарал (месела, 52-йикъал) ацалтайтIа, и межлис тешкилнавай касдиз 52-югъ виниз акъудунин ният хьана кIандач.

Лезгинский исламский просветительский портал