Суал: КупIунал «Аль-ФатихIа» сура кIелайла «Амин» гафуник «Рабба-ль-Аламин» гафар кухтун дуьз яни?

Жаваб: Дуьзни я ва гьа и кар авун меслятни къалурзава. «Амин» лугьудай гафунин мана «кьабул ая» ва я «зи ялвардиз (дуьадиз) жаваб це» лагьай чIал я. Аллагь-Таалади дуьа ийизвайбуруз Вичин (яни Аллагьдин) тIварцIелди тIалабун эмирзава. Къуръанда лагьанва (мана): «Аллагьдихъ гуьрчег тIварар ава, куьне гьа и гуьрчег тIвараралди тIалаб ая» («Аль-АгIраф» сура, 180- аят). «Рабба-ль-Аламин» гафар Аллагьдин гуьрчег тIварарикай сад я. Абурун манани «Я Алемрин Рабби» я.

 Шариатдин ктабрани «Амин»-дилай кьулухъ «Рабба-ль-Аламин» гафар кухтун хъувун меслят къалурзава («Муъни-ль-Мугьтаж», 1- том, 223- чин; «Шигьаб» гьашият «Магьалли», 1- том, 218-чин; «Шаргьу-ль-Мафруз», 104- чин).

Имам Шафииди вичин «Умму» ктабда кхьизва: «Амин» гафунилай гуьгъуьниз «Рабба-ль-Аламин» ва я гьа и манадин гафар лугьун хъсан я» («Итгьаф», 3- том, 78- чин).

Лезгинский исламский просветительский портал