Азан гузвай вахтунда кикериз темен гун

Муадзинди (азан гузвай касди) «Ашгьаду анна Мугьаммада-р-Расулюллагь» лугьудайла, еке тупIарин кикер вилеривай гвягъун ва гьа вахтунда «Ашгьаду анна МухIаммадан гIабдугьу ва расулюгьу разиту биллягьи раббан ва биль-Ислями динан ва би МухIаммадин (Аллагьдин салатни  салам  хьуй адал) набиййан» - Шариатди тестикьарнавай амал я. И амал тестикьарзавай гьадисар: «Гьар гъилера Абу Бакраз (Аллагь рази хьуй) азан гузвай касдин «Ашгьаду анна Мугьаммада-р-Расулюллагь» гафар ван хьайила, ада и гафар тикрар ийизвай ва еке тупIарин кикериз темен гана, абур вилеривай гвязавай.

 Ада ийизвай амал акурла, Пайгъамбарди (Аллагьдин салатни  салам  хьуй адал) лагьана: «Зи дустуни (Абу Бакра) хьиз ийизвай гьар са инсандин гьакъиндай за шафаат ийида (Къияматдин юкъуз адан тереф хуьда)» (Дайлами).

Имам Сагьавиди лагьана: «Мужибату-р-рагьмати ва азаиму-ль- Магъфира» ктабда Абуль Аббас ибн Абу Бакралай агакьарнавай гьадис кхьенва: «Азан гузвай касди и гафар «Ашгьаду анна МухIаммада-р-Расулюллагь» лугьудайла, «МархIабан бихIабиби ва къуррати-ль-гIайни МухIаммад ибн Абдуллагь (Аллагьдин салатни  салам  хьуй адал)» лагьана еке тупIарин кикериз темен гана, абур вилеривай гвягъай касдин вилер буьркьуь ва гьич начагъ жедач».

Имам Сагьавиди мад лагьана: Аш-Шамсу Мугьаммад Салигь аль-Маданиди вичиз Маждидивай ван хьайи ихтилат ахъайна: «Азан гудайла Пайгъамбардин (Аллагьдин салатни  салам  хьуй адал) тIварцIин ван хьайила, адал салават гъана ахпа еке тупIарин кикериз темен гана абур вилевиривай гъвягъай касдин вилер гьич начагъ жедач». Ахпа Ибн Салигьа лагьана: «Факъигь Мугьаммад ибн Зарнади Иракдин бязи алимрикай ихьтин ихтилат ахъайдайна: «Дугъриданни, абуру тупIар вилеривай гвядайла, икI лугьузвай: «Салляллагьу гIаляйка я саййиди я расуляллагь, я хIабиба къальби ва я нура басари ва къуррата гIайни». Абуру чпи гьа икI ийиз эгечIайдалай кьулухъ мад вилер тIа хьанач лагьана. Ибн Салигьа лагьана: «Аллагьдиз  шукур хьуй! И гафарин ван хьайидалай кьулухъ зани гьакI ийиз хьана ва зи вилер тIа хьанач ва за умуд кутазва, иншааллагь, абур буьркьуь хьуникай Аллагьди  хуьда ва начагъ жедач». «Шаргьу Нигьая» ктабда кхьенва: «Ваз чир хьухь! Азан гудайла сад лагьай «Ашгьаду анна МухIаммада-р-Расулюллагь» гафарин ван хьайила, суннат я лугьун: «Салляллагьу ТагIаля гIаляйка, я Расуляллагь»; кьвед лагьай сеферда «Ашгьаду анна МухIаммада-р-Расулюллагь» ван хьайила, – суннат я лугьун: «Къуррату гIайни бика, я Расуляллагь», ахпа, кикер вилеривай, гвядайла лугьуда: «Аллагьумма матти’ни бисам’и ва басари». ИкI авур касдиз Пайгъамбарди (Аллагьдин салатни  салам  хьуй адал) Женнетдин рехъ къалурда». Гьа и гафар «Канзу убад» лугьудай ктабдани кхьенва.

Гьуьрметлу стхаяр ва вахар! И кIвалах неинки гьалал, ам гьакIни меслят къалурнавай амал тирди гьадисри ва алимрин гафари баян ганва. Гьар са инсанди вичи хкязава: ам зайиф гьадисриз ва алимрин гафариз табий жедани, жедачни! Эгер са мусурман зайиф гьадисдиз табий жез хьайитIа, масадаз адаз айиб ийидай ихтияр авач. И амал хъсанди тирди Агьлу сунна ва-ль джамаадин алимри тестикьарзава. ИкI хьайила, ша чун гьа и алимриз табий жен!

Лезгинский исламский просветительский портал