Дастамаз чIур хьун

Агъадихъ галай вахтара дастамаз чIур жезва:
 
1. Инсандин вилик ва я кьулухъ галай тIеквенрай са шей (ял, цвар, баир, къван, шарар, мазью, вадью ва мсб.), маядилай гъейри акъатайла. Мая акъатайтIа, чIехи дастамаз (беден михьиз чуьхуьн) къачун лазим я.  
 
2. Ахварал фейила. Амма инсан ял акъат тийидай тегьерда ацукьна ксайтIа, дастамаз чIур жедач. 
 
3. Са гьихьтин ятIани себеб аваз (начагъвал, пиян хьун ва мсб.) инсан вич-вичелай фейила. 
 
4. Шариатди эвленмиш жедай ихтияр гузвай къарши тир жинсинин хамунихъ манийвал авачиз хкIуртIа. Агъадихъ галайбурухъ галукьайтIа, дастамаз чIур жезвач: дидедихъ (дишегьлийриз - бубадихъ), тахай дидедихъ (тахай бубадихъ), эмедихъ (имидихъ), халадихъ (халудихъ), чIехи бубадихъ (чIехи дидедихъ), вахахъ (стхадихъ), некIедин вахахъ (некIедин стхадихъ), рушахъ (хцихъ), тахай рушахъ (тахай хцихъ), хтулдихъ ва масабурухъ, яни шариатди эвленмиш хьун къадагъа авунвай инсанрихъ (магьрам). ГьакIни дастамаз чIур жезвач, эгер сарарихъ, кикерихъ ва я чIарарихъ галукьайтIа.
 
5. Гъилерин капашралди яни гъилерин ва тупIарин къене пад манийвал авачиз жуван ва я чарадан гьаяйрихъ, я тахьайтIа яру ратунин гьалкъадихъ (жинсинилайни яшдилай аслу тушиз) галукьайтIа.
 
Инал гъайи агьвалатрикай сад себеб яз дастамаз чIур хьайи гьалдиз  гъвечIи гьадас лугьуда. Дастамаз гвачир касдиз капI ва тIаваф (Кябедилай элкъуьн) ийидай, Къуръандик хкIадай, Къуръан жувахъ галаз тухудай ихтияр авач (Къуръандик хкIун тавуна адан аятар, сураяр кIелдай ихтияр ава). 
 
«КапI мусурмандин пак буржи» ктабдай.
 
Лезгинский исламский просветительский портал