Инсанди йикъа пуд ферз капI вахтунда ийиз ва амай кьве капI къазани хъийизватIа, абур кьабулзавани?

КпIар эсиллагь тийидалди гьакI авунни хъсан я. Аллагьдин  регьим зурбади я, инша-Аллагь, Ада кьабулда. ИкI ийизвай кас гъавурда акьун лазим я хьи, капI ахъаюн гунагь авай кIвалах я, гьавиляй ада гьар гъилера капI ахъа хьайила, Аллагьдивай гъил къачун тIалабна, ам къаза хъувуна кIанда. Гъил къачун тIалабна, ахъаяйди эвез хъийизвайбурулай Аллагьди  гъил къачуда лагьанва. Амма а кас гьамиша кьве капI къаза ийиз вердиш тахьурай, ихьтин касди абур вахтунда ийидай мумкинвал хьайитIани ийидач. Идалайни гъейри ам гьамиша абур вахтунда ийиз жедатIа лугьуз фикирда хьана кIанда. 

И месэладихъ галаз алакъалу са кьиса ава. Са сеферда са хуьруьз цIийи имам атана. Ада мискIиндай азан гана, амма касни аниз атанач. Ахпа ам куьчедиз экъечIна, куьн мискIиндиз капI ийиз вучиз къвезвач лагьана. Абуруни чпи капI ийизвайди туш лагьана жаваб гана. КапI тавунин себеб жузурла, абуру чпелай алакьзавач лагьана. «Экуьнин, нисинин, рагъдандин, гъетрен ва месин кпIарин вахтунда куьне вуч ийизва?» - жузуна имамди. «Экуьнин ва месин кпIарин вахтунда чун ксузва, амай кпIарин вахтунда чун азад я», - жаваб гана жемятди. «ЯтIа куьне нисинин, рагъдандин ва гъетрен кпIар ая», - теклифна имамди. «Бес амай кьве капI галачиз гьикI жеда?» - мягьтел хьана жемят. «Амайбурулай Аллагьди  гъил къачудайдак чна умуд кутада», лагьана имамди. Гьа икI абур пуд кпIунал мискIиндиз къвез хьана. Йикъарикай са юкъуз хуьруьз маса имам хкведа. Килигзава имам, кпIарал жемят къвезва, рикIиз шад жезва адан. КилигайтIа месин ва экуьнин кпIарал касни къвезвач. И кардал мягьтел хьайи имамди жемятдивай жузуна: «Куьне месин ва экуьнин кпIар ийизвачни?» Абуру жаваб гана: «Ваъ, валай вилик хьайи имамди чаз пуд капI ийиз чирнай». Гила и имам вичелай вилик хьайи имамдин кьилив фена жузуна: «Аллагьди  хиве тунвай кпIарикай вуна а жемят гьикI азадна?» Ада жаваб гана: «Сифтедай зун а хуьруьз атайла, ана авайбуру гьич са капIни ийизвачир. За абуруз пуд капI ийиз чирна, вуна гила абуруз амай кьвед чира».

ИкI хьайила, гьуьрметлу стхаярни вахар, кпIар эсиллагь тийидалди, жезвай пуд-кьуд капI вахтунда авуна амай сад-кьвед къаза хъувунни хъсан я. ИкI ийизвайда вичин хиве авай бурж акъудзава.

Лезгинский исламский просветительский портал