Гьаждикай куьрелди

Гьаж-им чун Аллагьдин  разивилив мукьва ийизвай Исламдин вад лагьай шартI я. Им курортдиз физвай мисал туш, шартIарни ина курортдинбур туш. Эгер чун ксузвай чкадин дарвални зегьемвал бегенмиш тахьана чна къулай шартIар истемишзаватIа, чун шайтIандин гуьгъуьналлаз физва. Ша чна чун эхиратда ксудай чка рикIел гъин-са юкI гьяркьуьвал алай, месин чкадал-чил, хъуьцуьган-къван ва юлдашни-чи крар (хъсан ва писбур) тир сур. Чаз гьажди чи сурун лакьан и кьил а кьил авачир Женнетдин багълариз ва я цIай авай кIамуз элкъуьрдай мумкинвал гузва. Вуч хкядатIа-чи гъиле ава.

Гьаждин вахтунда Меккедиз гьа са вахтунда дуьньядин вири пипIерай миллионралди зияратчияр кIватI жезва. Абурал гзафбурал Гьарамдин патавай мугьманханаяр гьалтзавач, абур гзаф багьани я. 

Гзаф зияратчияр Гьарамдиз кIвачи-кIвачи финиз мажбур жезва, са бязибуру багьа таксияр кьазва, са кьадар пулар серфзава. Гьа ихьтин гьалар Меккедай Минадиз, анай Арафатдиз, ахпа Муздалифадиз фидайлани аквада. Са бязи вахтара яргъалди автобусар гуьзлемишуниз мажбур жезва. Виш агъзурралди зияратчияр гьа са вахтунда са чкадай масаниз кIвачи-кIвачи физва. Ихьтин четин гьалара, сабур квахьдайла,Къияматдин юкъуз Арасат майдандал акъваздайди анай СиратIал муькъвелай ракъурдайди рикIел гъана кIанда. Ана чаз я такси, я къулай шартIар авай автобусар теклифдай са касни жедач. Анжах чи хийирлу крари, хуш къилихри,масадалай гъил къачуни ва маса хъсан ерийри чаз а муькъвелай фена Женнет къазанмишдай мумкинвал гуда.

РикIел хуьн лазим я, мугьманханайрин нумраяр ва палаткаяр а чкайрин къиметни ганвай талукь кьадардин инсанар патал я. Шариатдини чаз масадан чкаяр ва талукь кьадардилай гзаф чка кьун къадагъа ийизва. Им чарадан эменни вичиз кьун ва гьа чун хьтин зияратчийриз зулум авун лагьай чIал я. Аллагьди  Вичиз акси яз авур гунагьрилай гъил къачуда, амма масадан эменни жуваз кьунилай, инсанриз зулумар авунилай-ваъ, та гьа инсанри чпи гъил къачудалди. Къияматдин юкъуз Аллагьди  чавай чи вири хъсан крар вахчуна, чна адалатсузвал авурбурув вахкуда. Эгер чахъ хийирлу са карни тахьайтIа, абурун гунагьар чав вахкана чун Жегьеннемдиз рекье твада.

Къуй Аллагьди  чаз, гьуьрметлу зияратчияр, жуван нефсиниз дурум гана гьаж акI кьиле тухудай мумкинвал гурай хьи, Аллагьди  ам чавай кьабулдайвал.

Катl ама...

Предыдущая глава

Скачать книгу

Лезгинский исламский просветительский портал