Гьаждикай куьрелди

Зу-ль-гьиджа вацран 9-юкъуз кьиле тухузвай гьерекатар ва Арафатдал фин

Зу-ль-­гьиджа вацран 9-югъ алукьайла, рагъ экъечIнамазди вири зияратчияр Арафат лугьудай чкадал физва. Арафатдал акъвазун гьаждин кар алай рукнуйрикай-гьерекатрикай я, гьикI хьи, амай крарилай, гьерекатрилай алатайла, ам патал вахтунин тайин тир сергьятар ава ва ам ахъаяйтIа, алава хъийиз жедач.

Арафатдал акъваздай вахт Зу-ль-гьиджа вацран кIуьд лагьай йикъан нисинилай гатIумзава ва къведай йикъан сегьерар малум жедалди давам жезва. Нагагь зияратчи и вахт алатдалди Арафатдал тефейтIа, адан гьаж атIузва ва ада гьаж гуьгъуьнин йисара мумкинвал хьанмазни къазадай хъувун чарасуз я.

Арафатдин югъни чка Адамни Гьава Женнетдай чилел акъудайдалай кьулухъ гуьруьшмиш хьайи ва виридалайни гуьзел югъ я. И юкъуз иблис гьич садрани тахьай хьиз хажалатди кьада ва адал азаб акьалтда, вучиз лагьайтIа адаз Аллагьди зиярат ийизвайбурун гзаф кьадар гунагьар гьикI багъишзаватIа ва сергьят авачир кьван Вичин регьимлувилер гузвайдини аквазва. Мугьаммад Пайгъамбарди  (Аллагьдин салатни  салам  хьуй адал) лагьана: «Нагагь зияратчиди Арафатдинюкъуз Арафатдал алаз, Аллагьди вичин гунагьрилай гъил къачунвач, лагьана фикиравуртIа, ам виридалайни чIехи гунагьжеда». ГьакIни Пайгъамбардин  (Аллагьдин салатни  салам  хьуй адал) ихьтин гьадис ава: «Нагагь Арафатдинюгъ жуьмяйикъал гьалтайтIа, и гьаж адетдин 70 гьаждив барабар жеда». Ихьтин гьаждиз «Аль-­гьаж аль-­акбар» лугьузва. И юкъуз Пайгъамбарди  (Аллагьдин салатни  салам  хьуй адал)  вичин эхиримжи гьаж авунай.

Бязи зияратчийри гъалатI яз фикирзавайвал, бес Жабаль ар-Рагьмат тIвар алай гуьнедал хкаж хьана кIанда. Амма Арафатдин сергьятра гьи чкадал хьайитIани акъвазайтIа жеда, анжах гуьнедин кIане, чIехи къванерин патав, Аллагьдин Пайгъамбар (Аллагьдин салатни  салам  хьуй адал)  акъвазай чкадал акъвазун меслят къалурзава.

И юкъуз жендек чуьхвена Намират мискIинда жемятдихъ галаз капI авун хъсан яз гьисабзава. ГьакIни югъ дуьаяр ийиз, гъил къачун тIалабиз ва Къуръан кIелиз акъудун меслятзава. Нисинилай алатайла 1000 сеферда «Аль­-Ихлас» сура кIелна ва, Ибн Аббаса (Аллагь рази хьуй) агакьарайвал, Аллагьдивай кьве дуьньядани чарасуз тир шейэрин патахъай тIалабайтIа, хъсан я. ГьакIни Пайгъамбарди  (Аллагьдин салатни  салам  хьуй адал) кIелай агъадихъ галай дуьа Арафатдал кIелун меслятзава:

 «Ля илягьа илля-­л-лагьу вахIдагьу ляшарика лягьу, лягьу­-ль­-мульку, ва лягьу-­ль­ххIамду, ва гьува гIаля кулли шайъинкъадир. Аллагьумма­жгIаль фи къальби нуран,ва фи самгIи нуран ва фи басари нуран. Аллагьумма­шрахI ли садри, ва яссир ли амри».

«Сад тир Аллагьдилай гъейри, лайихлу  ва ибадат авуна кIани мад са шейни  авач, Адахъ барабарбур авач! Агъавал  ва шукур анжах Адахъ ава, ва Ам вири  шейэрал къуватлу я! Я Аллагь, къиметлу  чирвилерин нурдалди зи рикI, япарин  ван ва вилерин ишигъ ацIура! Я Аллагь, заз рикI ачуха (гьакъикъат аннамишиз жедайвал) ва зи крар кьезилара! »

ГьакIни кIелайтIа хъсан я:

«Я ман ля юшгъилюгьу шаънун гIан шаънин ва ля самгIун гIан самгIин, ва ля таштабигьу гIаляйгьи-л­ь-асвату! Я ман ля тугълитIугьу­-ль­-масаилю, ва ля тахталифу гIаляйгьи л-люгъату! Я ман ля юбримугьу ильхIахIу­ль­-мульхIина ва ля тузжиругьу масъалату­с­саилина! Азикъна барда гIафвика ва хIалавата мунажатика».

«Я са крари маса крарикай машгъул  тийизвайди ва садаз яб гуниз масадаз яб  гуни манивал гунтийизвайди Вич патал  сесер са-садак акахь тийизвайди! Я гзаф  тIалабунралди рекьелай алуд тежерди  ва чIалар жуьреба-жуьре туширди! Я  чин кIевибурун чинин кIевивили икрагь  хьунал тегъизвайди ва тIалабзавайбурун  тIалабунрини галатунал тегъизвайди! Ви  гъил къачунин шадвал чал агакьара ва. Вахъ галаз рахунин шадвални!»

Чна винидихъ лагьайвал, Арафат дагъдал акъваззавай вахт Зу-ль-гьиджа вацран кIуьд лагьай йикъан нисинилай  кьулухъ къвезвай вахт я ва  йикъан экуьнин сегьерар ядалди  акъвазайтIани жеда, амма гьа и вахтарин  арайра са декьикьада хьайитIани акъвазайтIани бес жеда. Анжах Арафат чкадилай рагъ акIидалди эвичIун меслят къалурзавач, нагагь ни акI авуртIа, ахьтинда и гъалатI эвезунин лишан яз жерме къурбанд ткIун лазим я. Мадни са кар къейдна кIанда.  Муздалифадиз гьасятда рагъ акIанмазни  финин лазимвал авач. Арафатдал алачухра акъвазайтIа, регьятвал я, пробкайра акIидалди. Нагагь Арафатдай  йифен кьуларилай алатайла экъечIайтIа, рекьер азад жеда ва Муздалифада акъвазунин чарасузвал жедач. Адан сергьятар машиндаваз атIун ва къванер гадарун патал дуьз Минадиз фин регьят  я.

Скачать книгу

Лезгинский исламский просветительский портал