Балгъан нажас яни?

Нажас – им ахьтин чирк я хьи, вич бедендал, парталрал ва я капI ийизвай чкадал алаз хьайитIа, капI дуьз тежезвай. 
Нажасдик акатзава: кицI, вак, баир, цвар, иви, ирин, экъуьчайла къвезвайбур, ички, кьейи гьайванрин як ва хамар. Эгер кьейи гьайванрин хамар (кицIин ва вакIанбуралай гъейри) кутугай тегьерда михьайтIа, абур михьи жеда, амма сар ва хаз михьи жедач. Мусурман адетралди тукIунвай, як тIуьниз ишлемишзавай гьайвандин хам ва сар михьибур я, гьатта михьдалди. Кьейи балугъни нажас туш. Дамаррай иви тефизвай кьейи гьашаратар циз аватайтIа, ам нажас жедач, гьатта абурун кьадар гзаф тахьанмаз.
Гила куь суалдиз жаваб гуда. Балгъан пуд чкадай атун мумкин я: мефтIедай, хурудай ва руфунай. Сифте кьве чкадай атайди михьиди яз гьисабзава, руфунай атайди нажас я. Балгъан нажас яз гьисабун патал ам якъиндиз руфунай атанвайди чир хьана кIанда, нагагь ам хурудай ва я руфунай атанатIа лугьуз шак аватIа, нажас яз гьисабзавач. Руфунай атай балгъандихъ пис ни ва хъипи ранг жезва
(«Фатгьу-ль-Аллям»).
Лезгинский исламский просветительский портал