Суннат истихара капI

Истихара гаф, араб чIалай таржума авурла, меслят тIалабун лагьай чIал я. Яни истихара капI ийизвай инсанди Аллагьдивай  меслят тIалабзава. Са кIвалах ийиз кIанзавай, амма адакай хийир ва я зарар жедатIа чин тийизвай инсандиз истихара капI авун меслят къалурзава. Пайгъамбардин (Аллагьдин салатни салам хьуй адал) гьадисда лагьанва: «Адаман рухвайрин (яни инсанрин) бахт Аллагьдивай истихара авун ва бахтсузвал истихара тавун я» («Изах» 46-чин).

Маса гьадисда Аллагьдин Расулди (Аллагьдин салатни салам хьуй адал) лугьузва: «Квекай садаз са кIвалах ийиз кIан хьайила, ада кьве ракат капI авурай ва вичин рикIе авайди лугьурай, ахпа дуьа кIелрай» (Ибн Мажагь). Джабир бин Абдуллагьа ахъайна: «Аллагьдин Расулди (Аллагьдин салатни салам хьуй адал) чаз гьикI Къуръан чирзавайтIа, гьакI гьи кIвалах ийиз хьайитIани истихара ийиз чирна» (Тирмизи).

Са арифдар инсанди лагьана: «Кьуд шей ийизвайдаз кьуд шей Аллагьди  багъишда:

1. Шукур ийизвай инсандиз генани гзаф няметар гуда;

2. Туба ийизвай инсандилай гъил къачуда;

3. Хъсан амалар ийидайвал куьмек тIалабзавайдаз а куьмек гуда;

4. Гьамиша меслят тIалабзавайди (истихара ийизвайди) гъалатIрикай хуьда». ИкI хьайила, истихара хъсан шей я, гьавиляй ам вири кIвалахра, иллаки важиблу крара авуна кIанда. Инал чна исятда истихара ийидай къайда кхьида.

Эвелни-эвел чаз Пайгъамбарди (Аллагьдин салатни салам хьуй адал) чирайвал кьве ракат капI ийида. КпIунин ният ихьтинди я: «Ният авуна за кьве ракат суннат истихара капI авуниз Аллагь патал».

Сад лагьай ракатда «аль-Фатигьадин» гуьгъуьнай «аль-Кафирун» сура ва кьвед лагьайда «аль-Ихлас» кIелда. «аль-Кафирун» сура чин тийизвай инсандивай кьве ракатдани «аль-Ихлас» кIелайтIа жеда.

КапI куьтягьайла и дуьа кIелда:

اللّهُـمَّ إِنِّـي أَسْتَخيـرُكَ بِعِاْـمِك، وَأسْتَقْـدِرُكَ بِقُـدْرَتِـك، وَأَسْـألُـكَ مِنْ فَضْـلِكَ العَظـيم، فَإِنَّـكَ تَقْـدِرُ وَلا أَقْـدِر، وَتَـعْلَـمُ وَلا أَعْلَـم، وَأَنْـتَ عَلاّمُ الغُـيوب، اللّهُـمَّ إِنْ كُنْـتَ تَعْـلَمُ أَنَّ هـذا الأمْـرَ- وَيُسَـمِّي حاجَتَـه - خَـيْرٌ لي في دينـي وَمَعـاشي وَعاقِـبَةِ أَمْـري، فَاقْـدُرْهُ لي وَيَسِّـرْهُ لي ثـمَّ بارِكْ لي فيـه، وَإِنْ كُنْـتَ تَعْـلَمُ أَنَّ هـذا الأمْـرَ شَـرٌ لي في دينـي وَمَعـاشي وَعاقِـبَةِ أَمْـري، فَاصْرِفْـهُ وَاصْرِفْني عَنْـهُ وَاقْـدُرْ لي الخَـيْرَ حَيْـثُ كانَ ثُـمَّ أَرْضِـني بِـه

 

«Аллагьумма инни астахирука бигIилмика ва астакъдирука бикъудратика ва асъалука мин фазликал гIазими фаиннака такъдиру ва ла акъдиру ва тагIляму ва ля агIляму ва анта гIаллямул гъуйуби. Аллагьумма ин кунта тагIляму аннагьу (инал квез ийиз кIанзавай шейиникай лугьуда) хайрун ли фи дини ва дунья ва магIаши ва гIакъибати амри ва гIажилигьи ва ажилигьи факъдиргьу ли ва яссиргьу ли сумма барик ли фигьи, ва ин кунта тагIляму аннагьу (инал квез ийиз кIанзавай шейиникай лугьуда) шаррун ли фи дини ва дунья ва магIаши ва гIакъибати амри ва гIажилигьи ва ажилигьи фасрифгьу гIанни васрифни гIангьу вакъдир лиял хайра хIайсу кана сумма раззини бигьи».

И дуьадин мана:

«Я Аллагь, за Вавай Ви илимдалди зун патал вуч хъсан ятIа, гьам хкягъун тIалабзава, за Вавай куьмек тIалабзава, гьакъикъатда, завай са шейни ийиз жезвач, Вавай жезва, заз са шейни чизвач, Ваз чизва. Я Аллагь, гьакъикъатда, им (инал квез ийиз кIанзавай кIвалах лугьузва) зи кIвалах я, ам зун, зи дин, дуьньядин ва эхиратдин уьмуьр патал хийирлуди ятIа, Вуна заз а кIвалах кьисмет ая, гьа карда зал берекат ракъура ва ам ийиз заз регьят ая. Амма а кIвалах (инал мад ниятда авай кIвалах лугьуда) зун, зи дин, дуьньядин уьмуьр ва эхиратдин уьмуьр патал чIуруди ятIа, Вуна ам залай алуд ва са хъсан кIвалах кьисмет ая, ам гьина аваз хьайитIани ва адалди зун рази ая».

Нагагь и дуьадилай кьулухъ рикIи куьн а кIвалах авунихъ ялзаватIа, ам авун хъсан жеда; рикIи адахъ ял тавуртIа, ам тавун хъсан я. Эгер куь рикIи са патахъни ял тийиз хьайитIа, истихара тикрар хъийида, гьатта ирид сефердилайни гзаф хьайитIани («Ифсах»). Гьелбетда, истихара гьарам тир ва меслят къалур тавунвай амалриз ийидач.

Лезгинский исламский просветительский портал