Суал: Некягь ийидайла рушан ва гададин патай векилар галаз ийизва, вучиз рушни гада чеб жезвач?

Жаваб:

Рушанни гададин патай векилар галаз некягь ийидай ихтияр ава, амма а векилар адалатлу (яни еке гунагьар тийизвай, капI ийизвайбур) хьун лазим я. Руш некягьдал къведай адет шариатда авач, адан паталай адан вали (къаюм: буба…) атана кIанда, вучиз лагьайтIа рушавай вичивай вич гъуьлуьз гуз жезвач, ам валиди гузва. Амма гада вич атун хъсан яз гьисабзава, гьакI ятIани адаз векил ракъурдай ихтиярни ава.

Чи халкьдин арада рушанни гададин имияр ва я халуяр некягь эцигиз фидай адет хьанва, гьатта бязи вахтара эвленмиш жезвай гададизни рушаз чпиз некягь ийизвайдакай хабар жезвач. Нагагь чамра вичин паталай физвай касдикай векил тавуртIа, некягь дуьз жезвач. Векил и къайда ийида: «Я Агьмед ими… за вакай заз Айиша пабвиле къачун патал векил авуна». Агьмед имидини гьасятда векилвал икI кьабулун лазим я: «За векилвал кьабулна». Некягь ийидай чкадал рушан валиди икI лугьуда: «За зи руш Айиша вакай векил авур Мугьаммадаз гъуьлуьз гана». Гададин векилди икI кьабулда: «Ви руш Айиша за закай векил авур Мугьаммадаз гъуьлуьз кьабулна». Нагагь некягь ийидай чкадал рушан бубани чам алайтIа, вири регьят жеда. Бубади икI лугьуда: «За зи руш Айиша ваз Мугьаммад гъуьлуьз гана». Чамрани гьасятда икI кьабулда: «За ви руш Айиша гъуьлуьз кьабулна». Амма рушанни гададин кьведан патайни векилар хьайитIа, лугьудай гафарин ва шартIарин патахъай лап четин жеда. Гьавиляй, гьуьрметлу мусурманар, жуван уьмуьрда жезвай и важиблу мярекатда – некягьда иштирак авун лап чарасуз я. Некягьдал рушан валидини чамра (гьелбетда, кьве шагьиддини) иштирак авун - им тамам къайда я.

Лезгинский исламский просветительский портал