Ички хъун гьарам я! Часть 1

Малум тирвал, Исламда ички хъунал къадагъа эцигнава. Идахъ гьелбетда вичин мана ава. Виридаз ашкара тирвал, ичкидикай анжах зиян хкатзава. Инсандин сад лагьай везифа вичин сагъламвал, уьмуьр ва акьул хуьн я. Идан гьакъиндай Дувандин юкъуз гьар садан хиве жавабдарвал жеда. Инсандин чандиз зарар гузвай, кьил кьилелай ракъурзавай гьар са шей гьарам я. Вич мусурман яз гьисабзавай гьар са инсанди Аллагь-Таалади къалурнавай гьар са гьарам шейинивай яргъаз хьана кIанда. Эгер ички гьарам туш лугьудайбур хьайитIа, ахьтинбур диндай акъатунин къурхувал ава. Пак тир Къуръанда Аллагь-Таалади лугьузва (мана)

«Инсанар ва жинерар За абуру Жуваз ибадат авун патал халкьнава» («Зарият» сура, 56-аят). 

Халис мусурмандин фикир гьихьтинди хьун лазим ятIа, пак тир Къуръанда Аллагьди гъавурда твазва (мана): 

«Муъминар Аллагьдин ва Адан Пайгъамбардин (Аллагьдин салатни салам хьуй адал)  буйругъдин гьакъиндай Ислам диндиз эвер гана хабардар авурла, абуру лугьун лазим я: «Яб гузва ва муьтIуьгъ жезва» («Нур» сура, 51-аят). 

Маса аятда лугьузва (мана): «Сад Аллагьдиз ибадатзавай халкьдиз, Аллагьди гайи буйругъдилай маса важиблу буйругъ хьун лазим туш» («Аль-Маида» сура, 50-аят). 

Чаз Къуръандин аятрай аквазвайвал, Гьакимди Вичи ва Пайгъамбарди (Аллагьдин салатни салам хьуй адал)  къалурай рехъ кьун чи везифа я. Гьавиляй ички хъуникай къерех хьана кIанда. Къуръанда Аллагьди лугьузва (мана): 

«ШейтIандиз ичкидин ва къизмиш къугъунрин куьмекдалди куь арада душманвал ва такIанвал тваз кIанзава, адаз куьне Аллагь рикIел гъин тийидайвал, капI тавуна кIанзава» («Аль-Маида» сура, 91-аят). 

Катl ама...

 

Лезгинский исламский просветительский портал