Нежес ва адакай михьи хьун

Пиянарзавай гьар са шей, бедендай акъатзавай вири чиркер, иви, ирин, экъуьчунар, балугъ ва цIицI квачиз кьенвай вири гьайванар, чан алай гьайвандикай атIанвай са кIус (тIуьниз ишлемишуниз ихтиярар ганвай гьайванрин чIар ва йис квачиз), кицI, вак, тIуьниз ишлемишунал къадагъа алай гьайванрин нек, ибур вири нежесрик, яни чиркерик акатзава. 

Эгер кьеженвай кицIихъ ва вакIахъ, я туштIа жуван гъил кьеженваз абурухъ галукьайтIа, са сеферда михьи накьв кутуна ва ругуд сеферда михьи цел чуьхуьн хъийида. НекIедилай гъейри са шейни тагузвай таза эркек аялдин цвар фейи чкадиз цин стIалар хъчирайла бес жезва. Амма руш аялдин цвар фейи чка чуьхуьн хъийида.

Нежесдай чиркин хьайи чка, вичихъ галай ни, дад ва ранг галатдалди чуьхуьда. Амма адалай кьулухъ эгер, ранг, я туштIа ни галамаз хьайитIа (анжах кьведни санал ваъ), Аллагь-Таалади адалай гъил къачузва. 

Бедендал, парталрал, я туштIа капIдай чкадал винидихъ лагьай нежесрикай сад кьванни алатIа капI ийидай ихтияр авач.

Куьчедай фидайла жува-жув кьацIур тавуна хуьз алакь тийидай нежес квай палчухдилай Халикьди гъил къачузва. ГъвечIи хирерай атай иви, раб ягъай чкадай атай иви (эгер ам гзаф тахьайтIа), хеб-мал ацадайла бирдан некIедиз аватай фитедин куьлуь кIус хьайитIа, Аллагьди гъил къачузва. Са гафуналди, жува-жув хуьз четинзавай гьар гьи нежесдилай хьайитIани алемрин Халикьди гъил къачузва.

Ислам динда Регьимлу Аллагьди чаз кьезилвилер ганва. Эгер икьван гагьда хьайи умматар кьуртIа, абурун шариатда четин истемишунар авай. Месела, эгер парталдиз хатадай цвар фейитIа, абуру а чка атIана гадарзавай. Чи шариатда лагьайтIа ахьтин партал чуьхвена алукIзава.

Къуй Аллагьди чун гьар жуьредин чиркерикай хуьрай! Чан гудайла, мецел келима-шагьада алаз беден михьи яз рекьидайбурукай хьурай чун! Амин. 

 

Лезгинский исламский просветительский портал