КапI – Женнетдин куьлег. Часть 4

Асгьабрин ва хъсан ксарин кпIунихъ галаз авай рафтар- вилер

Мужагьида (вичелай Аллагь рази хьуй) ахъайзавайвал, Пайгъамбардин (салат ва салам хьуй адал) машгьур асгьабар кпIунал фейила абур Аллагьдихъай кичIела жедай. Али асгьабдикай (вичелай Аллагь рази хьуй) лугьузвайвал, капI къвез мукьва адан чина авай рангар дегиш хьана ам зурзун акатна жедай. Адан сир вуч ятIа жузурла ада лагьана: «Им чилеривайни цаваривай кьабулиз тахьай аманат вахгузвай вахт я. Заз чизвач завай ам вахгуз жедатIа».

Са сеферда Али асгьабан (вичелай Аллагь рази хьуй) ятурда хьел акIанвай. Гьикьван гьалават хьанайтIани жезвай тIарвилер себеб яз хьел акъудиз жезвачир. КапIдай вахт алукьайла Али асгьаб кпIунал фена пел чилел эцигай вахтунда, кIватI хьанвайбурукай сада къуватдивди ятурда авай хьел ялна акъудна. КапI авуна куьтягьай Али асгьабди кIватI хьанвайбуруз лагьана: «Куьн хьел ахкъудиз кIватI хьанвани?» Адаз хьел ахкъуднавайдакай лагьайла, тажуб хьайи Али асгьабди вичиз са тIарвални тахьанвайди малумарна.

Алидин хва Гьасана (Аллагь рази хьурай чпелай) дастамаз къачудайла адан чина авай рангар дегиш жедай. А кардин себеб вуч ятI жузурла ада лагьана: «Им Гьейбатлу Гьакимдин вилик акъваззавай вахт я».

Пайгъамбардин (салат ва салам хьуй адал) хтул Гьуьсейнан хва Зайнуль Абидин Али аль-Жифриди (Аллагь чпелай рази хьурай), гьар юкъуз агъзур кьил капI ийидай ва садрани тагьажуддин капI ахъайнач. Дастамаз къачудайла адан чинин рангар дегиш жедай, кпIунал фейила ам зурзадай. Адавай вучиз ам акI аватIа жузурла ада лагьана: «Квез чизвачни зун нин вилик акъвазна кIанзаватIа?» Са сеферда ам кпIунал алайла адан кIвал цIай кьуна кузвай. И вахтунда Али аль-Жифриди секиндиз вичин капI ийизвай. Адавай вучиз цIай туьхъуьриз алахъначтIа жузурла, лагьана: «Ахиратдин цIаюни зун и дуьньядин цIаюникай къайгъусуз авунва».

Аббасан хва Абдуллагьакай (Аллагь рази хьурай чпелай) лугьуда хьи, азандин ван хьайила ам дамарар экъис хьана, вилер яру хьана ишехьдай, адан хур накъварай кьежидай. Сада лагьаналда: «Ви рикIик къалабулух кутазвай заз азанда са шейни аквазвач». Ада жаваб гана: «Эгер инсанриз азандин гафарин манадикай хабар авайтIа, абурун рикIелай ахвар алатдай, ял ягъуникай ва секин хьуникай абур магьрум жедай».

Увайс аль-Кагъраниди вири йиф гагь рукугьдаваз, гагь саждадаваз акъуддай.

Са сеферда Али асгьаба (вичелай Аллагь рази хьуй) мискIинда капIдай вахтунда залзала хьана. И вахтунда адан патарив гвай капIзавайбур катна. Нетижада хьайи залзаладик мискIиндин цлар уьцIена. Али асгьаб лагьайтIа гьа алай чкадал юзунни тавуна аламазмай. КапI куьтягьай ада элкъвена патарив килигайтIа вич текдиз амай, адаз хьайи агьвалатдикай гьич хабарни хьанач.

Предыдущая глава

Лезгинский исламский просветительский портал