Чи хуьре икьван чIавалди я мискIин, я имам авач. Чна вуч авун лазим я?

Виликдай чи бубайри хуьр кутадалди сифте вирида санал мискIин эцигзавай. Гьайиф хьи, бубайрин тIварар кьаз чна хур гатазва, амма абуру авур амалар ийиз гьазур туш. ГьакI ятIани, шукур Аллагьдиз, эгер куь фикирдиз ихьтин суал атанатIа, куьн Аллагьди  мискIин эцигун патал, я туш хьи, ам эцигдай инсанар чIалал гъун патал хкянавай кас я. Хуьруьн агъсакъалар ва са тIимил кьванни диндихъ рикI кузвай инсанар кIватIна куьне мискIиндин ва имамдин месэла къарагъарайтIа, квез еке суваб жеда. И карда квевай райондин имамдин куьмек тIалабайтIани жеда. Белки адаз куь хуьре авайбуруз мискIин герек авайди чизвачтIа. Хуьре имам жедайвал, гила амаз Дагъустандин Исламдин университетдиз кIелиз жегьилар ракъурун лазим я. Гьар са хуьруьхъ чпин хуьруьнви имам хьайитIа лап хъсан жеда.

 Гьадисда лагьанва: «МискIин эцигайдаз (ам эцигунин карда куьмек гайидаз) Аллагьди женнетда кIвал эцигда».

Идалайни гъейри, мискIин авачир хуьре я азан жезвач, я ачухдаказ жемятдин капI. Азан гун хуьруьн агьалийрин хиве авай сунна я, ачухдаказ йикъа вад сеферда жемятдин капI авун хуьруьн агьалийрин хиве авай ферз я. Яни ам тавуртIа, вири халкьдиз гунагь жезва. Иниз килигна, мискIинар авачир хуьрера абур эцигун лазим я. МискIин эцигайдалай кьулухъ ам ягъалмиш жегьилри вачхун тийидайвал, хуьряй жегьилар Исламдин институтдизни ракъурун чарасуз я. 

 

Лезгинский исламский просветительский портал