Коррупциядихъ галаз гьикI женг чIугвада?

коррупция взятка ислам

Аллагьдин Пайгъамбарди (Аллагьдин салатни  салам  хьуй адал) лагьана: «Аллагьди  ни дашбаш гузватIа ва ни ам къачузватIа, абур негьнава». Сир туш, чун яшамиш жезвай гьукумат коррупциядин кьарада ава.  И кардикай кIвалин кайванийрилай гатIумна властдин къурулушдин кьилера авайбурал кьван – вирида лугьузва. «Россияда коррупцияди кьунвай сергьятар акьван чIехибур я хьи, икI эхи хъийиз хьун мад мумкин туш!» - им Москвадин Кремлда ацукьнавай кьилин чиновникрикай садан къейдун я. 

«Эхи хъийиз хьун мумкин туширди» - чаз виридаз чизва, гьелбетда, амма и азар гьикI сагъарна кIанда, ингье гьа ида чак, дугъриданни, сифте нубатда къалабулух кутун лазим я. Аллагьдиз  шукур хьурай, чавай са цIийи шей арадал гъунин важиблувал авач, гьикI хьи, ихьтин месэлаяр вилик вахтарани авайди тир ва инсаниятдин тарихда ам гьялунин чешнеярни малум я. Абур гьикI гьялнатIа, гьадаз фикир гана кIанда: куьн куьмекдалди гьална?

Виридаз машгьур пак кас тир Фузайл бин Ияза лагьана: «Нагагь захъ Аллагьди  кьабулун лазим тир са дуьа хьанайтIа, за регьбердин гьакъиндай тIалабдай». Им ван хьайила, инсанар мягьтел хьана ва идан гьакъиндай гъавурда тун тIалабна. Фузайла жаваб гана: «Нагагь за жуван патахъай тIалабайтIа, хийир анжах заз жеда. Нагагь за регьбердин гьакъиндай тIалабайтIа, адахъ марифатлувал хьунин карда, ихьтин марифат вири халкьдихъ жеда!»

И пак касдин келимайра чIехи камаллувал ава ва ана чи суалдиз жавабни ганва. Нагагь халкьдин кьиле акъвазнавай регьбер марифатлу ва гьахъ гвай кас хьайитIа, халкьни гьа ихьтинди жеда. Дегь девиррин камалэгьлийри лугьудай: «Инсанрин хесетарибур халкьдин кьиле акъвазнавай регьберрин хесетар я. Регьберри вуч авуртIа, халкьдинни гьам ийида».

Аль-Гъазалиди кхьена: «Мусурманрин кьиле акъвазай Валид бин Абдул Малика еке фикир эцигунризни хуьруьн майишатдиз гузвай, адалай кьулухъ хьайи Сулейман бин Абдулмаликаз шадлухвилерни межлисар кIандай. Умар бин Абдулазиз пак ва дуьньядин малдевлет терги яз кьунвай ва михьивилелди машгьур кас тир. А девирдин алимрикай сада лагьанай: «Заз халкьди вичин регьберрин хесетар кьадайди чидачир, Валидан девирда вирида эцигунрихъ кьил гьикI кутунатIа такунмаз, инсанри багълар кутаз эгечIна. Кьиле Сулейман акъвазайла халкьдин тIуьнхъунихъ ялиз эгечIна. Вирида сада-садавай хабарар кьадай ни гьихьтин хуьрекар гьазурзаватIа ва вуч незватIа. Умар бин Абдулазизан девирда лагьайтIа, заз инсанар Къуръан кIелунихъ гьикI элкъвенатIа акуна ва абуру Аллагьдиз ибадат авунин карда къастунал кIевивал къалурзавай».

Лугьузвайвал, Ануширванан девирда, персиядин регьбердин, вичин гьахълувилел машгьур хьайи касдин – сада чил маса къачуна. Са кьадар вахт алатайла адаз гьа и чилелай хазина жагъана. Чилин иесиди и кардикай виликан иесидиз лагьана. Ада жаваб гана: «За ваз чил маса гана ва заз чизвачир аник хазина квайди. Гьавиляй аник вуч кватIа, гьам види я». Амма цIийи иеси идал рази хьанач ва ада хълагьна: «Заз чарадан девлет кIандач, за маса къачурди чил тир». ИкI виликан иесиди хазина вичинди туш, цIийидаз лагьайтIа, а хазина вичиз къачуз кIанзавачир. ИкI абурун гьуьжет Ануширванал агакьна. И ксарин михьивилел, гьахълувилел ам гзаф шад хьана ва абурун гьуьжет икI гьялна: абурукай садан руш муькуьдан гададиз гъуьлуьз гун меслят къалурна ва жегьилар патал гьа и хазинани харж ая лагьана. ГьикI хьи, Ануширван гьахъ кIандай регьбер тир ва инсанарни адан девирда гьакI яшамиш жезвай, гьахълудаказ.

Нагагь ихьтин кар гьахъсуз регьбер кьиле акъвазнавай девирда хьанайтIа, и гьуьжетда гьар сада хазина вичинди я лугьуз тестикьдай…

Чна коррупциядикай ва чи обществода артух хьанвай са кьадар нагьакьан крарикай гзаф лугьузва. Амма властдин кьиле акъвазнавайбур чеб и кардин гьакъиндай жавабдарвал гвайбур тирдан гъавурда сакIани акьазвач ва абуруз чпин марифат туькIуьр хъийиз кIанзавач, я са дуьз патахъ дегишвилерни тухуз гьавалат жезвач.За кхьенвай цIарар камалэгьлийрин ктабрай къачунвайди я, абуру са шумудни са асирар идалай вилик къе чи хиве гьатнавай тIалрикай лагьана.  Хъсан жедай виликкьилик квай гьакимри абуруз фикир ганайтIа!

Лезгинский исламский просветительский портал