Садакьа низ гайитIа хъсан я?

садака

Гузвай садакьадихъ авай къиметлувал ва хийирдикай тийижар са касни авач жеди. Ци цIай гьикI секинарзаватIа, гьакI садакьади Аллагьдин ажугълувал алудзава ва бедбахтвиливай яргъа ийизва.  Садакьа чаз ва чун хъсандиз чидайбуруз гун виридалайни хъсан я, гьакIни чи куьмекдихъ вил галайбуруз: къуни-къуншийриз, мукьва-кьилийриз, гьатта ам яргъара аватIани, муьгьтеж тирбуруз ва етимриз.  

Лугьудайвал виридалайни хъсан садакьа – им жуван хизандин патахъай гузвайди я. Месела, гьа ихьтин амай хизанар патални ам гун ферз я. Алава къулайвилер тешкилун сунна яз гьисабзава. Алимрин са дестеди гьисабзавайвал, яргъал сиягьатрай хкведайла (сафар) виридалайни хъсан, садакьа, къуй абур ширинлухар ва я аялрин нинияр хьурай -им жуван паб, аял патал са шей къачуна абуруз шадвал багъишун я. Са сеферда са итим Пайгъамбардин (Аллагьдин салатни  салам  хьуй адал) патав атана ва лагьана: «За са чIехи гунагь авунва». Пайгъамбарди  (Аллагьдин салатни  салам  хьуй адал) адавай вуч гунагь авунва лагьана хабар кьурла, ада жаваб гана бес идакай лугьуз вичиз утанмиш, регъуь я. Вичин суал са шумудра тикрар хъувуна ва адаз тайин жаваб жагъун тавур Пайгъамбарди  (Аллагьдин салатни  салам  хьуй адал) итим рахкур хъувуна ва адан гуьгъуьниз лагьана: «Ваз ихьтин гунагь ийиз Аллагьдихъай вучиз регъуь хьанач, гьатта ам заз лугьуз регъуь хьайила?» И кас хъфейдалай кьулухъ Жабраил  малаик атана ва Пайгъамбардиз  (Аллагьдин салатни  салам  хьуй адал) лагьана: «И кас вичин гунагьрилай гъил къачун тIалабнавайди тир». Пайгъамбарди  (Аллагьдин салатни  салам  хьуй адал) хабар кьуна: «Адан гунагь квекай ибарат я?» Жибрилди адан суалдиз жаваб гайидалай кьулухъ алава хъувуна: «А касдихъ гъвечIи аялар ава ва абур са квел ятIани шад авун, им адан гунагьрилай гъил къачудай кар я». Аялриз шадвал гъуналди гъил къачуз жедай хьтин гунагьарни ава. Азабазият гунилайни гъил къачуз жедай гунагьар ава, яни гьалалдин малдевлет хизан паталди къазанмишуналдини. Са сеферда Айшади  вичиз лукI дишегьли къачуна. Жабраил малаикди Пайгъамбардин  (Аллагьдин салатни  салам  хьуй адал) кьилив атана адаз эмирна, и лукI дишегьли азад авун патахъай ва рекьени адаз недай хумравар гун истемишна.  Фидай рекье лукI дишегьлиди хумравдиз кIас яна, рекьел тIалабзавайди акурла адав вичив гвай хумраврикай сад гана. Жабраил Пайгъамбардин (Аллагьдин салатни  салам  хьуй адал) патав хтана ва лагьана: «А лукI дишегьли элкъвена хкваш: вичи гайи хумравдин са паюни ам женнетэгьли авунва». Садакьа муькъвер, рекьер, яд тухун патал ва мискIинар патал гун хъсан я. Маса гафаралди лугьун хьайитIа, ам гзаф къиметлу ва инсанди вич паталди суваб къачудай терефдихъ пагъайтIа хъсан кар жеда. Амма чи девирда виридалайни хъсан кар мутаалимар, медресада кIелзавайбур патал гун хъсан кар яз гьисабзава, гьикI хьи, алай девирда чун ахьтинбурухъ муьгьтеж я. Абуруз гайи садакьадай сувабар ирид виш сеферда артухарна гузва.  Ихьтин мутааллимар (кIелзавайбур) тахьайтIа, алимар жедач, общество ва динар чкIида.  Чпиз куьмек гана кIанзавайбур, зал гьалтайтIа, тилмизарар ва абуруз илим чирзавай муаллимар, алимар я.  Абур диндин илим чеб патал виридалайни хъсанди яз гьисабнавай ксар я ва и дуьньядин девлетрихъ галтуг тийизвайбурун жергеда ава, чпиз гайи тIимилдални рази жезва. Инал чна лагьайвал садакьа гана кIанзавайбурукай (табаруъ) я. Рамазандин вацра сив хуьн алатайла гузвай закатдикайни садкьадикай. Гьа ибурухъ галаз барабар яз виридалайни садакьа акъатуниз лайихлубур мутааллимар я, акьулбалугъ хьанвайбур ва чпи обществодиз са хийир гудайдахъ инанмишбур. Исламдин илимар къачузвайбурукай – тилмизаррикайни, абуруз тарсар гузвай алимрикай ва абуруз гана кIани куьмекдикай сагъ са ктабар кхьинин лайихлувал ава. Амма, иншаллагь, инал лагьанвайди, къейднавайди бес я.

Лезгинский исламский просветительский портал