Мусурман дишегьлиди вичел гьихьтин партал алукIун лазим я?

условия хиджаба

Аллагьдин эхиримжи Ктабда - Къуръанда, гьакIни эхиримжи Пайгъамбар Мугьаммадан (Аллагьдин салатни  салам  хьуй адал) насигьатра мусурман дишегьлидин парталдиз ийизвай истемишунрикай талукьдаказ лагьанва. Ингье абур:

1. Дишегьлиди чинилайни гъилин кьве капашдилай гъейри бедендин амай вири чкаяр агалун лазим я. И истемишун “ашкара чкайрилай гъейри амай чкаяр чарадаз къалурмир” аятдиз алимри гайи баянрал ва маса гьадисрал бинеламиш хьанвайди я.

Са гьадисда Мугьаммад Пайгъамбардин (Аллагьдин салатни  салам  хьуй адал)паб Айшади икI лугьузва: “Са сеферда чи кIвализ зи мукьва-кьили дишегьли атана. Пайгъамбар (Аллагьдин салатни  салам  хьуй адал) ам акурди, кьулукъ элкъвена. “Ам зи хтул я!” - лагьана за. Пайгъамбарди (Аллагьдин салатни  салам  хьуй адал) жаваб гана: “Эгер дишегьли вацран кьилер хьана акьулбалугъ ятIа, адаз чинлайни ва идалай гъейри (Пайгъамбради (Аллагьдин салатни  салам  хьуй адал)  вичин капашдив муькуь гъилин ксуьлдилай кьуна, гъилин цIумунал къведалди са капашдин ара туна), амай чкаяр къалурдай ихтияр авач”.

2. Дишегьлидин партал рекъинал акъвазайла и патай а патаз экв акъатдайди ва беден аквадайди хьана кIандач. Мугьаммад Пайгъамбарди (Аллагьдин салатни  салам  хьуй адал) лагьана: “Партал алай гьа са вахтунда кьецIил тир, къекъведайла галтад жез, итимар рекьяй акъудзавай дишегьлияр неинки Женнетдиз фидач, абуруз гьич адан нини къведач” (Гьадис Абу Гьурайради гъанвайди я). Са сеферда Бану Тамиман несилдай дишегьлияр Пайгъамбрадин (Аллагьдин салатни  салам  хьуй адал) паб Айшадин патав атана. Абурал кьелечI, и патай а пад аквадай парталар алай. Айшади абуруз лагьана: “Эгер куьн халисан мусурманар ятIа, а квел алайбур квез кутугай парталар туш!” Са маса сеферда адан патав са свас атана, ва адан чинлайгъуз кьелечI къир авадарнавай. Айшадиз ам акурла, ада лагьана: “ИкI ни алукIзаватIа, а кас “Ан-Нур” суьредин гьакъикъат-вилихъ иннанмиш кас туш”. Винидихъ гъанвай кьве вакъиани аль-Къуртубидин тафсирда ганва.Къенин дишегьлийри алукIзавай жуьре Айшадиз акунайтIа, яраб ада вуч лугьудайтIа?...

3. Партал алкIайди хьана кIандач. Бязи вахтара кьелечI парталдилайни алкIай парталди гена рекьяй акъудзава.

4. Дишегьлиди алукIзавай парталар итимдин ваъ, дишегьлидинбур хьана кIанда. Итимрихъ - вирида кьабулнавай итимрин партал ава, дишегьлийрихъ лагьайтIа - дишегьлийрин. Пайгъамбарди (Аллагьдин салатни  салам  хьуй адал) вичин гьадисра гьам дишегьлийриз тешпигь жезвай итимар, гьамни итимриз тешпигь жезвай дишегьлияр ачухдаказ негьзава. Ахьтин амалри инсандин вичин тIебиатдиз аксивал ийизва.

5. Чара итимар алай чкадал парталдикай духийрин ва маса хуш ни галай атиррин ни атана кIандач.

6. Партал пара дамах гвайди ва вичел фикир желбдайди хьана кIандач.

Винидихъ ганвай истемишунрихъ галаз кьан тийизвай партал алукIзавай касдиз Къияматдин юкъуз Аллагьди жаза гуда. Эгер дишегьлиди и тIварар кьур къанунрал амал авуртIа, ада вичин уьмуьр гьар патахъай регьятарда.

Лезгинский исламский просветительский портал