Вучиз руфунал ксудай ихтияр авач?

Руфунал къаткун, Абу Давуда Ибн Къайса Аль-Гъаффаридин патахъай агакьарнавай келимадин бинедаллаз, тавуртIа хъсан я: «Зун мискIинда руфун кIаникна ксанвайла са итимди кIвач кьуна лагьана: «ИкI ксайла Аллагьдиз хъел къвезва». Зун элкъвейтIа, Пайгъамбар (Аллагьдин салатни  салам  хьуй адал) акуна» (Сунану Аби Давуд, 4/468-№, Муснаду Агьмад бин Гьанбал, 3/429-№, Аль-Мажму ли имами навави Шаргьул Мухаззаб, 4/477-№).

Пайгъамбардилай (Аллагьдин салатни  салам  хьуй адал) чешне къачуна эрчIи къвалал ксун хъсан я. И кардин гьакъиндай Сагьигьуль Бухаридин 5/5327, 5956 нумрайриз килигиз жеда. 

Медицинадини руфунал къаткун тавуртIа хъсан тирдан гьакъиндай лугьузва. И кар аламат туш, вучиз лагьайтIа Пайгъамбар (Аллагьдин салатни  салам  хьуй адал)милайимвилелди Аллагьдин  патай атанвайди я ва адан вири крарани рахунра акьул, тарс ава. Духтурри руфунал ксуниз «кьенвайдан къаткун» лугьузва, вучиз лагьайтIа акI ксанвайла къахрагъ тахвун мумкин я.

Руфунал ксанвай инсандиз вуч жезва? Хурун тахта кIватI хьана, жигеррал илис жезва. Ана са кьадар гьава цIийи тежез амукьзава. И кар акьван пис туш, амма инсан ахварик квай вахтунда и гьалди вичин кар аквазва. Эгер 50 йис яшдилай алатнавай инсан ятIа, атеросклероз аватIа, лап пис нетижадал атун мумкин я 

Лезгинский исламский просветительский портал