Аллагьдин патай савкьат

Умар асгьабди (Аллагь рази хьуй) чал ихьтин са ихтилат агакьарнава: «Са юкъуз чун асгьабарни галаз Пайгъамбардин (Аллагьдин салатни  салам  хьуй адал)   патав ацукьнавай. Садлагьана инал лацу партал алай гуьрчег са итим атана акъатна. Ацукьнавайбуруз ам садазни танишди тушир.

Ам атана Пайгъамбардин (Аллагьдин салатни  салам  хьуй адал)   патав мет метIез яна ацукьна адаз суалар гуз башламишна: «Ислам квекай ибарат я?»

 Мугьаммад Пайгъамбарди (Аллагьдин салатни  салам  хьуй адал)   жаваб гана: «Ислам вад даяхдикай ибарат я. Сад лагьайди – инсанди Аллагь-Таала сад тирди ва Мугьаммад Пайгъамбар (Аллагьдин салатни  салам  хьуй адал)   Ада ракъурнавай Пайгъамбар тирдан гьакъиндай шагьидвал авун, и кардихъ рикIин сидкьидай инанмиш хьун. Кьвед лагьайди, - йикъа вад капI авун. Пуд лагьайди – мал-девлет авай касди закат гун. Кьуд лагьайди – Рамазандин вацра сив хуьн. Вад лагьайди – уьмуьрда са сеферда, мумкинвал аваз хьайитIа, Гьаждал фин». Хабар кьур касди Мугьаммад Пайгъамбардиз (Аллагьдин салатни  салам  хьуй адал)   дуьз я, лагьана тестикьарна. Мад и касди Мугьаммад Пайгъамбардивай (Аллагьдин салатни  салам  хьуй адал)   хабар кьуна: «Иман квекай ибарат я?» Мугьаммад Пайгъамбарди (Аллагьдин салатни  салам  хьуй адал)   лагьана: «Иман – им Аллагьдихъ, Адан малаикрихъ, Ктабрихъ, пайгъамбаррихъ, Къияматдин йикъахъ ва хийир-шийир Аллагьдин патай тирдахъ инанмиш хьун я». Хабар кьур касди дуьз я, лагьана. Атанвайда Мугьаммад Пайгъамбардиз (Аллагьдин салатни  салам  хьуй адал)   суалар гун давамарна: «Игьсан вуч затI я?» Мугьаммад Пайгъамбарди (Аллагьдин салатни  салам  хьуй адал)   жаваб гана: «Игьсан – им Аллагь-Тааладиз, ваз Ам аквазвачтIани Адаз вун аквазвайди хьиз ибадат авун я. Са гафуналди, ийизвай ибадат, исламдин ва имандин шартIар рикIин сидкьидай кьилиз акъудун».

Хабар кьур касди Мугьаммад Пайгъамбардиз (Аллагьдин салатни  салам  хьуй адал)   дуьз я, лагьана тестикьарна. Атанвайда Мугьаммад Пайгъамбардивай (Аллагьдин салатни  салам  хьуй адал)   Къиямат йикъан лишанрикай, аламатрикай хабар кьуна. Пайгъамбарди (Аллагьдин салатни  салам  хьуй адал)   лагьана (мана): «ЧIехи тир Аллагь-Таала нарази жедай кIвалахар, адалатсузвилер жеда». Ахпа и суалар гайи кас къарагъна и межлисдилай хъфена. Ахпа Мугьаммад Пайгъамбарди (Аллагьдин салатни  салам  хьуй адал)   Умар асгьабдивай (Аллагьдин салатни  салам  хьуй адал)   хабар кьуна: «Умар, чир хьанани ваз суалар гайи кас вуж ятIа?» Умар асгьабди (Аллагьдин салатни  салам  хьуй адал)   лагьана: «Аллагьдизни Адан Пайгъамбардиз хъсан чида». Мугьаммад Пайгъамбарди (Аллагьдин салатни  салам  хьуй адал)   лагьана: «Ам Аллагь-Тааладин эмирдалди чаз ислам дин квекай ибарат ятIа чириз инсандин кIалубда аваз атанвай Жабраил малаик тир».

Мугьаммад Пайгъамбарди (Аллагьдин салатни  салам  хьуй адал)   лугьузва: «Гьи касди вад капI жемятдихъ галаз мискIинда авуртIа, гьадаз Аллагь-Таалади вад шей гуда. Сад лагьайди – и дуьньядин гъам-хажалатар, кесибвал, дарвилер кьилел къведач. Кьвед лагьайди – сурун (суалар) азабрикай къутармиш жеда. Пуд лагьайди – эхир Къияматдин юкъуз эрчIи гъиле ктаб вугудай хъсан ксарикай жеда. Кьуд лагьайди – СиратI муькъвелай регьятдаказ фидай ксарикай жеда. Вад лагьайди – гьисаб суал авачиз Аллагь-Таала рази хьанвай женнетэгьли ксарикай жеда».

Мугьаммад Пайгъамбарди (Аллагьдин салатни  салам  хьуй адал)   лугьузва: «Са капI жемятдихъ галаз мискIинда авурдаз 27 суваб хъсан кар авунвай хьиз гьисабзава». Пайгъамбарди (Аллагьдин салатни  салам  хьуй адал)   мадни лугьузва: «КапI – диндин даях я, ни капI тунатIа гьада диндин даях хана».

Пайгъамбардин (Аллагьдин салатни  салам  хьуй адал)   патав са асгьаб атана. «Я Расулуллагь, - лагьана хабар кьунай ада, – виридалайни хъсан амал вуч ятIа?» Пайгъамбарди (Аллагьдин салатни  салам  хьуй адал)   лагьана: «Вахт-вахтунда Аллагь-Тааладиз капI-тIеат авун я». Мугьаммад Пайгъамбарди (Аллагьдин салатни  салам  хьуй адал)   лугьузва: «Гьи касди вахт-вахтунда михьивал дастамаз гваз капI-тIеат авуртIа, гьа касдиз эхир Къияматдин юкъуз Аллагь-Тааладин патай хъсан пай жеда». Мугьаммад Пайгъамбарди (Аллагьдин салатни  салам  хьуй адал)   лагьана: «Йикъа вад капI ийизвай инсан Аллагь-Тааладин бурж ферз кьилиз акъудзавай инсан Аллагь-Таалади Женнетдиз ракъурда». Аллагь – Таалади ганвай еке тир савкьат мусурман касдиз йикъа вад сефер беден чуьхуьзвай инсан гьикI михьи жезватIа, гьакI йикъа вад сефер капI ийизвай мусурман кас гунагьрикай михьи жезва. Мугьаммад Пайгъамбарди (Аллагьдин салатни  салам  хьуй адал)   лугьузва: «Эхир Къияматдин югъ хьайила Аллагь-Таалади са бязи инсанрин чина цава авай гъетери хьиз нур твада. Малаикри а инсанривай хабар кьада: «Куь чина ихьтин нур вучиз ава?» Абуру лугьуда: «Чун и дуьньядал, азандин ван хьайила, михьивал авуна мискIиндиз фидай инсанар тир». Ахпа са бязи инсанрин чинавай нур ацIай вацран нур хьиз жеда, малаикри хабар кьада: «Куьн и дуьньядал гьихьтин инсанар тир?» Инсанри жаваб гуда: «Чун азандин ван тахьанмаз михьивал авуна мискIиндиз фидай инсанар тир». Ахпа са бязи инсанрин чинавай нур цава авай ракъинин нур хьиз жеда. Малаикри хабар кьада: «Куьн гьихьтин инсанар тир и дуьньядал? А инсанри лугьуда: «Чун михьивал авуна мискIиндин къене азандихъ яб гудай инсанар тир».

Къуй Аллагь-Таалади чун вахт-вахтунда капI ийидай ксарикай авурай.

Амин!

Лезгинский исламский просветительский портал