Халид ибн Валида агакьарнавай еке гьадис.

Халид ибн Валида агакьарнавай еке гьадис.  

Мугьаммад Пайгъамбардин (Аллагьдин салатни  салам  хьуй адал) кьилив са араб атана икI лагьана: «Я Расуляллагь (Аллагьдин салатни  салам  хьуй адал), зун ви кьилив и дуьньяда бахтлу хьун патал заз лазим тир шейэр чириз атанвайди я».

Пайгъамбарди (Аллагьдин салатни  салам  хьуй адал) адаз лагьана: «Хабар яхъ, за жавабар гуда».

1.    Ада жузуна: «Заз зун чирвал авай инсанрикай виридалайни артухди хьана кIанзава». 

    Пайгъамбарди (Аллагьдин салатни  салам  хьуй адал) лагьана: «Аллагьдихъай  кичIе хьухь - вун чирвал авайбурукай виридалайни артухди жеда».

      2. Ада жузуна: «Заз зун виридалайни девлетлуди хьана кIанзава».

Пайгъамбарди (Аллагьдин салатни  салам  хьуй адал) лагьана: «Аллагьди  ваз гайидал рази хьухь - вун виридалайни девлетлуди жеда».

3.    Ада жузуна: «Заз зун виридалайни адалатлуди хьана кIанзава».

    Пайгъамбарди (Аллагьдин салатни  салам  хьуй адал) лагьана: «Жуваз кIанзвайди масад патални кIан хьухь».

4.    Ада жузуна: «Заз зун виридалайни жумартди хьана кIанзава».

    Пайгъамбарди (Аллагьдин салатни  салам  хьуй адал) лагьана: «Инсанриз хъсанвал ая, вун виридалайни жумартди жеда».

5.    Ада жузуна: «Заз зун Аллагьдин  вилик кьетIенди хьана кIанзава».

    Пайгъамбарди (Аллагьдин салатни  салам  хьуй адал) лагьана: «Мукьвал-мукьвал Аллагь  рикIел гъваш - вун виридалайни кьетIенди жеда».

     6. Ада жузуна: «Заз захъ Камил-Иман (халисан Иман) хьана кIанзава».

    Пайгъамбарди (Аллагьдин салатни  салам  хьуй адал) лагьана: «Жуван къилих (ахлакь) хъсанар ая, вахъ халисан Иман жеда».

     7. Ада жузуна: «Заз зун къени хьана кIанзава».

    Пайгъамбарди (Аллагьдин салатни  салам  хьуй адал) лагьана: «Ваз Аллагь  аквазвайди хьиз ибадат ая, ваз Ам аквазвачтIани, Адаз вун аквазва кьван».

    8. Ада жузуна: «Заз зун Аллагьдиз табий тирбурукай хьана кIанзава».

    Пайгъамбарди (Аллагьдин салатни  салам  хьуй адал) лагьана: «Ферзер кьиле твах (капI, сивер хьуьн, закат, гьяж) - вун Аллагьдиз  табий тирбурукай жеда».

    9. Ада жузуна: «Заз зун Аллагьди гунагьрикай михьи авуна кIанзава».

    Пайгъамбарди лагьана: «Жунуб (тамам дастамаз чIур) хьайила,  гуьгъуьнай жендек чуьхуьх - Аллагьди вун гунагьрикай михьи ийида».

   10. Ада жузуна: «Заз зун Къияматдин юкъуз нурлу яз Аллагьди  къарагъар хъувуна кIанзава».

      Пайгъамбарди (Аллагьдин салатни  салам  хьуй адал) лагьана: «Зулум ийимир, Аллагьди  вун нурлу яз къарагъарда».

   11. Ада жузуна: «Заз Къияматдин юкъуз Аллагь  зав регьимлувиливди  эгечIна кIанзава».

      Пайгъамбарди (Аллагьдин салатни  салам  хьуй адал) лагьана: «Эвел жував ва масадбурув регьимлувиливди эгечIа».

   12. Ада жузуна: «Заз зи гунагьар тIимил хьана кIанзава».

      Пайгъамбарди (Аллагьдин салатни  салам  хьуй адал) лагьана: «Туба-астагъфир гзаф ая, ви гунагьар тIимил жеда».

   13. Ада жузуна: «Заз закай чIехи рикI авайди хьана кIанзава».

      Пайгъамбарди  (Аллагьдин салатни  салам  хьуй адал) лагьана: «Крара маса инсанриз шел-хвал, шикаят ийимир».

   14. Ада жузуна: «Заз зун виридалайни къуватлуди хьана кIанзава».

    Пайгъамбарди (Аллагьдин салатни  салам  хьуй адал) лагьана: «Аллагьдал  таваккал (умуд) ая - вун виридалайни къуватлуди жеда».

   15. Ада жузуна: «Заз Аллагьди зи ризкьи пара авуна кIанзава».

      Пайгъамбарди (Аллагьдин салатни  салам  хьуй адал) лагьана: «Гьамиша гъилер чуьхуьнар (дастамаз) гваз хьухь».

   16. Ада жузуна: «Заз зун Аллагьдин  ва Пайгъамбардин (Аллагьдин салатни  салам  хьуй адал) рикI алайди хьана кIанзава».

      Пайгъамбарди  (Аллагьдин салатни  салам  хьуй адал) лагьана: «Аллагьдизни Пайгъамбардиз (Аллагьдин салатни  салам  хьуй адал) вуч кIанзаватIа, гьам вазни кIан хьухь (яни, Гьабуруз кIани рекьяй алад)».

   17. Ада жузуна: «Заз Къияматдин юкъуз Аллагь  зал ажугълу тахьана кIанзава».

      Пайгъамбарди (Аллагьдин салатни  салам  хьуй адал) лагьана: «Вун Аллагьдин  махлукьатрал ажугълу жемир, Къияматдин юкъуз Аллагь  вални ажугълу жедач».

   18. Ада жузуна: «Заз Аллагьди  зи дуьа кьабулна кIанзава».

      Пайгъамбарди (Аллагьдин салатни  салам  хьуй адал) лагьана: «Гьарам затIарикай яргъа хьухь, Аллагьди  ви дуьа кьабулда».

 

   19. Ада жузуна: «Заз Къияматдин юкъуз Аллагьди  зи айибар, тахсирар чуьнуьхарна кIанзава».

      Пайгъамбарди (Аллагьдин салатни  салам  хьуй адал) лагьана: «Вуна масадбурун айибар, тахсирар чуьнуьхара, Къияматдин юкъуз Аллагьди вибурни чуьнуьхарда».

   20. Ада жузуна: «Зун гунагьрикайни гъалатIрикай куь хуьда?».

      Пайгъамбарди лагьана: «Аллагьдихъай  кичIевиляй вилерай авахьзавай накъвари, Шариатдиз табий хьуни ва азарри».

   21. Ада жузуна: «Аллагьдиз виридалайни вуч вине я?».

      Пайгъамбарди (Аллагьдин салатни  салам  хьуй адал) лагьана: «Хъсан ахлакь (къилихар), дамахсузвал ва бедбахтвилера сабур авун».

   22. Ада жузуна: «Аллагьдиз  виридалайни вуч такIан я?».

      Пайгъамбарди (Аллагьдин салатни  салам  хьуй адал) лагьана: «ЧIуру ахлакь ва къанихвал».

   23. Ада жузуна: «И дуьньядани эхиратда Аллагьдин  ажугъ куь секинарда?».

      Пайгъамбарди  (Аллагьдин салатни  салам  хьуй адал) лагьана: «Чинеба садакьа гуни ва сад-садахъ галаз хъелзавай инсанар туькIуьр хъувуни».

   24. Ада жузуна: «Эхиратда Жегьеннемдин цIай куь туьхуьрда?».

      Пайгъамбарди (Аллагьдин салатни  салам  хьуй адал) лагьана: «Бедбахтвилер ва гъам-хажалат хьайила, сабур къалуруни».

      И гьадисар кIелайла, имам Мустахфиюна лагьана: «Заз икьван маналу, дерин, менфятлу гьадис гьеле акурди туш».

 

Комментарии   

 
+1 #1 маина 03.07.2013 14:41
и гьадисар к1ел авурла диде ишехьна ..сагъул
Цитировать | Сообщить модератору
 
Лезгинский исламский просветительский портал