Рамазандин вацра сив хуьнин лайихлувиликай гьадисар 2

5. Муслима Абу Гьурайрадилай (Аллагь рзи хьуй)  агакьарнавай гьадисда лагьанва:

«Вири вад капI, жуьмя капI са жуьмядилай масадал ва сив хуьн са Рамазандилай масадал гунагьрикай михьивал хьиз жеда, эгер еке гунагьрикай яргъа хьайитIа».

 

6. Якъин цIиргъ авай гьадис Гьакима Ка’б бин Ужраталай (Аллагь рзи хьуй)  агакьарна: «Пайгъамбарди (Аллагьдин салатни  салам  хьуй адал)  лагьана:

 «Куьн минбардив агат». Чун адан мукьув фена. Пайгъамбар (Аллагьдин салатни  салам  хьуй адал)  минбардин сад лагьай кIарцIел хкаж хьайила, ада «Амин» лагьана, кьвед ва пуд лагьай кIарцIелни гьа и гаф тикрарна. Пайгъамбар (Аллагьдин салатни  салам  хьуй адал)  минбардилай эвичIайла, чна адавай жузуна: «Эй Аллагьдин Расул (Аллагьдин салатни  салам  хьуй адал) ! Къе чаз ви сивяй икьван чIавалди ван татай гафарин ван хьана!» Пайгъамбарди (Аллагьдин салатни  салам  хьуй адал)  жаваб гана: «Зи кьилив Жабраил малаик  атана ва лагьана: «Рамазандин вацра гунагьрикай михьи тахьай кас къуй регьимдивайни бахтунивай яргъа хьурай!» Зани «Амин!» лагьана. Зун кьвед лагьай кIарцIел хкаж хьайила, ада лагьана: «Ви тIвар кьурдалай кьулухъ салават кIел тавур кас къуй регьимдивайни бахтунивай яргъа хьурай!» Зани «Амин!» лагьана. Пуд лагьай кIарцIелни зун хкаж хьайила, ада лагьана: «Диде-буба (ва я абурукай сад) кьуьзуь жедалди абурун кьилив амукьай ва женнет къазанмиш тавур кас къуй регьимдивайни бахтунивай яргъа хьурай!» Зани «Амин!» лагьана».

Исламдин шейх, чIехи къутIб Алави аль-Гьаддад бин аль-Гьабиба кхьизва: «Маса варцарихъ галаз гекъигайла, Рамазандин вацра гунагьар михьдай мумкинвилер гзаф ава, и вацра гунагьрикай михьи хьуникай магьрум жедайди вичихъ гзаф гунагьар аваз, амма Аллагьдиз  далу гайи инсан я, гьавиляй ам Аллагьдин  регьимдивай яргъа хьуниз лайихлу жезва».

 

7. Байгьакъиди, Ибн Гьиббана ва Ибн Гьузаймади Салманалай (Аллагь рзи хьуй)  Ша’бан вацран эхиримжи йифиз Пайгъамбарди (Аллагьдин салатни  салам  хьуй адал)  авур насигьат агакьарна:

«Эй инсанар! Гзаф няметар авай варз алукьнава, и вацран къене агъзур вацралай хийирлу йиф ава, и вацра Аллагьди  юкъуз сив хуьн ферз ва йифиз къарагъиз ибадатдал машгъул хьун сувабдин кар яз авунва. И вацра са хъсан амал авуналди Аллагьдиз  мукьва жез алахъай инсан, маса варцара 70 ферз тамамарай касдиз тешпигь я. Им сабур авунин варзни я, сабур авурла гузвай суваб женнет я. Ва им сада-садаз хъсанвал ийидай, ризкьи артух жезвай варз я. И вацра масадаз сив ачухиз куьмек гайидаз гунагьрикай михьивал, жегьеннемдин цIукай къутармишвал ва гьа сив хвейидаз хьайи кьван суваб жеда, ам хвейидан суваб гьич тIимил тахьана». Чна лагьана: «Я Расуляллагь (Аллагьдин салатни  салам  хьуй адал) , сив хвейидаз тIуьн гудай мумкинвал чакай гьар садаз авач». Пайгъамбарди (Аллагьдин салатни  салам  хьуй адал)  лагьана: «Ахьтин суваб Аллагьди гьатта са хурма, хупI яд ва я нек садакьадиз паяйдазни гуда. И вацран эвел – регьим, юкьв – гунагьрикай михьивал, эхир – жегьеннемдин цIукай азад хьун я. Куьн и вацра кьуд амалдал гзафни - гзаф чалишмиш хьухь: абурукай кьвед авурла Аллагь квелай рази жеда, амай кьвед галачиз квевай жедач:  ибадат авуниз лайихлу анжах Аллагьдилай  гъейри мад са шейни авачирди шагьидвал авун;

 - гунагьрилай гъил къачун тIалабун;

 - Аллагьдивай женнет тIалабун;

 - жегьеннемдикай хуьн тIалабун.

Сив ачухдайла, сив хвейидаз яд гайидаз Аллагьди зи гьавиздай са сеферда яд гуда ва адаз та женнетдиз гьахьдалди цихъ къанихвал мад хъжедач».

 

Ибн Гьузаймади им якъин гьадис я лагьана.

8. Бухаридини Муслима Абу Гьурайрадилай (Аллагь рзи хьуй)  Пайгъамбардин (Аллагьдин салатни  салам  хьуй адал)  гьадис агакьарна: «Рамазандин варз алукьайла, женнетдин варар ачухзава ва жегьеннемдин варар агалзава, шейтIанарни къандалра твазва».

 

9. Тирмизиди, Гьакима ва Насаида агакьарнавай гьадисдин эхирда лагьанва:

«Рамазандин варз алукьайла, малаикди хабар гузва: «Эй, хъсанвал кIанзавайди, хъсан амалар ийиз алахъа! Эй, писвилихъ къекъвезвайди, ви кеспидикай кьил къакъуд». Гьакима и гьадис Бухаридинни Муслиман шартIуналди якъинди я лагьана.

Скачать книгу

Лезгинский исламский просветительский портал