Пак гьадисайрай къачунвай насигьатрин кIватIал

Мергьяматлу ва Регьимлу Аллагьдин тIварцIихъай

Сифте гаф

Алай вахтунда гзаф инсанар анжах и дуньядин крарал машгъул хьана. Абур и фана, куьтягь жедай дуьньядин уьмуьр патал, адан манадиз, гьикъикъивилиз ва къиметлувилиз фикир тагуз, кат-калтугунрин гуьгъуьна гьатнава. И кар себеб яз, ахьтин инсанар неинки куьтягь тежедай уьмуьрдизни эхиратдиз гьазур тушиз амукьзава, гьакIни бес кьадардин хийирдин крар гвачиз и дуьньядилай физва. И жуьредин татугай гьалара чун гьат тавун патал Аллагь-Таалади чаз багъишай уьмуьр Адан эмиррив ва насигьатрив кьадайвал кечирмишун лазим я.

Гьакъикъатда, Аллагьдихъ инанмиш тир инсанрин рикIериз, иманлуйриз хъсан насигьатри еке таъсир ийидайдал са шакни алач. Гьаниз килигна Мугьаммад Пайгъамбардини (Аллагьдин салатни салам хьуй адал), и месэладиз еке фикир ганвай. Адан асгьаби (женгинин юлдаш) аль-`Ибрад бин Сарийади (Аллагь вичелай рази хьуй – куьрелди ) лагьанай: «Са сеферда Аллагьдин Векилди (Аллагьдин салатни салам хьуй адал),  гузвай насигьатди чи рикIерик кичIкутуна ва чун вилерай накъвар къведай гьалдиз гъана. Чна эвер гана: «Я Аллагьдин Илчи (Расул)! Вуна лагьай гафар сагърай лагьана хъфизвайдан эвер гуниз ухшар я. ГьакIхьайила, чаз мадни са насигьат це ман!» Ада жаваб гана: «Ингье квез зи насигьат – Зурба ва Къудратлу Аллагьикай кичIе хьухь!»

Чна умудзава, мусурманрин машгьур, чIехи алим, арифдар, Исламдин делил тир Абу Гьамид аль-Гъазалидин 1 (Аллагьдин регьимдик хьуй вич) «Гьадис-уль-къудси»-дай 2  кIватIнавай агъадихъ гузвай насигьатри рикIин сидкьидай Аллагьдикай кичIе хьуниз, Адаз ибадат авуниз куьмекда ва эверда. Идалай гъейри, гьар са фагьум-фикир авай инсандиз Виридалайни ЧIехи тир Аллагьди эвер гузвай и насигьатри уьмуьрдин гьакъикъивилин гъавурда тамамдиз ва дериндай гьатуниз мумкинвал гудайдакни чна гьакIни умуд кутазва.

Инал гузвай насигьатри, са шакни алачиз, иманлуйриз еке таъсир ийида ва абур Аллагь-Тааладин мужизатрикай, лишанрикай фикир авуниз мажбурда. Идахъ галаз санал насигьатри авур крарай жуван гьахъ-гьисаб, гьерекатрал аявал авун истемишда, гьакIни кьиникьиз ва атIа, куьтягь тежедай дуьньяда инсандин кьилел вуч къведатIа, гьадаз гьазур хьуниз фикир гуз тада.

И жигьетдай, аль-Гъазалидин ктабдиз насигьатрин энциклопедия лагьайтIани жеда.

Къуй чаз Аллагьди Вичин эвер гунрин гъавурда дуьз акьуниз ва абурун геле аваз финиз куьмекрай!

Амин!

Скачать книгу


1 Гьижрадин 450-505 йисара (цIийи эсирдин 1059-1111 йисар) яшамиш хьана.

2Гьадис-уль-къудси – Аллагьдин гафарикай Мугьаммад пайгъамбарди (Аллагьдин салатни салам хьуй адал), лагьанвай куьруь ва дерин мана авай келимаяр я.

 

Лезгинский исламский просветительский портал