Вири крара хъсан ният хьун

Чир хьухь мусурман, къуй вун Аллагьди хуьрай, инсандиз чеб ийидай ихтиярар авай вири крар (ксун, тIуьн-хъун, кIвалах ва икI мад...) чавай Аллагь рази жедай къайдада кьилиз акъудиз жеда ва гьа идалди чалай агъзурралди сувабар къазанмишиз алакьда. ИкI хьун патал, чна а крар Аллагьдиз мукьва жедай ният аваз кьиле тухвана кIанда.
Пайгъамбарди (Аллагьдин салатни  салам  хьуй адал) лагьана: «Гьар са касдиз адан ниятдиз килигна вичи къазанмишзавайди гуда, гьар са касдиз адан ниятда вуч хьанатIа гьам гуда» 
(Бухариди ва Муслима агакьарна).
Мисал яз: Инсан экуьнин кпIунал вахтунда къарагъдай ният аваз фад ксузва, и кардалди ада вичин адетдин ахвар ибадатдиз элкъуьрзава.
 
Санал са шумуд ибадат авун
Чпин вахтунив мукъаятдивди, къайгъударвиливди эгечIзавай ксаривай гьа са вахтунда са шумуд жуьре ибадат кьилиз акъудиз жеда. Мисал яз гъин:
1. Мусурман кас яхдиз ва я тахьайтIа машинда аваз мискIиндиз физва, рекье ада зикир ийизва ва я тахьайтIа Къуръан хуралай кIелзава, и тегьрда ада гьа са вахтунда кьве ибадат ийизва.
2. Мусурман кас гьарам квачир мехъерик физва, ихьтин мехъерик иштиракун ибадатдин кар я, межлисда ада Аллагь рикIел гъизва (яни зикр ийизва) ва я тахьайтIа мехъерик иштиракзавай са маса касдиз диндал, яни Аллагьдин рекьел атуниз эвер гузва. Гьа и жуьре а касди кьве ибадат санал авун жезва.
 
Лезгинский исламский просветительский портал