Зи гъуьл – зи Женнет, я туштIа Жегьеннем я

Гьар са мусурман дишегьлидиз вичин гъуьл Женнет тирди чизва, анжах жуван гъуьлуьз гьикI гьуьрметда, адахъ галаз лайихлу араяр гьикI хуьда? Чун чи гъуьлерилай нарази вахтунда, бес чна делилар гьикI гъин? Са сеферда Пайгъамбардин (Аллагьдин салатни  салам  хьуй адал) патав са дишегьли атана ва лагьана: «Салам ваз, я Аллагьдин Расул (Аллагьдин салатни  салам  хьуй адал)! Зун ви патав дишегьлийри рекье тунва. Аллагь итимрин Агъа я ва гьакI дишегьлийрин Агъа, Адам итимрин буба я ва дишегьлийрин буба, вунни Аллагьди итимриз ва гьакI дишегьлийриз рекье тунва. ГьакI хьайила, итимар … женгиниз экъечIдайла, абуруз чпиз гьазурнавай пишкешдикай хабар ава. Чакай рахайтIа – дишегьлийрикай, чна гъуьлериз къуллугъзава ва кIвале ава, бес акI хьайила чи пишкеш гьихьтинди я?»

 Адаз Пайгъамбарди (Аллагьдин салатни  салам  хьуй адал) жаваб гана: «Зи патай дишегьлийриз салам це ва абуруз лагь хьи, чпин гъуьлериз муьтIуьгъ хьун адаз (жигьад авуниз) барабар я, анжах квекай тIимилбуру а кар ийизва, ам (муьтIуьгъ хьун) вичин папан вилик гъуьлуьн ихтияр я». Аллагьди дишегьлидиз ахьтин пай ганвач ва ам пишкешдикай магьрум авуналди усаларнавач. Аллагьди Вичин регьимдалди ва илимдалди дишегьли хвенва ва адаз кIвалин къене вичин гъуьлуьз муьтIуьгъ хьуналди бахт ва пишкеш ганва. Гьадисдал асаслу яз, эгер дишегьлиди йикъа вад капI ийизватIа, Рамазан вацра сив хуьзватIа, вичин намус хуьзватIа ва гъуьлуьз муьтIуьгъ ятIа, ам Женнетдиз гьахьда. Аллагь рази жедай, ибур дишегьлидин виридалайни регьят буржияр я. Дишегьлидиз инсанрикай виридалайни чIехиди гъуьл я, адалай гъейри садни авач. Гьадисда лугьузва: «Эгер Аллагьдилай гъейри масадан вилик сужда ийидай ихтияр авайтIа, за дишегьлидиз вичин гъуьлуьн вилик ам авун эмирдай. За зи Халикьдал кьин кьазва, дишегьлиди Аллагьдин вилик квай вичин буржияр кьилиз акъуддач, та ада вичин гъуьлуьн вилик квай буржияр кьилиз акъуддалди…». Вичелай гъуьл нарази дишегьлидин капI ва амай хъсан кIвалахар кьабулзавач. Гьадисда лагьанва: «Вичин гъуьлуьз хъел гъанвай дишегьлидин капI, я туштIа маса хъсан амал кьабулзавач, та гъуьл адалай рази жедалди». Гьадисдай аквазвайвал, вич гъуьлелай аслу ятIани, адалай шикаятар ийизвай дишегьли галай патахъни Аллагь килигдач (регьимдалди). Дишегьлияр Жегьеннемдиз гьахьунин себебрикай кьилинди, чпин гъуьлерин къадир чир тахьун, шукур тавун я. «Ви гъуьл вун патал – Женнет ва Жегьеннем я», лугьузва гьадисда. Чпин гъуьлерихъ галаз жедай араяр хкягъуналди, дишегьлийри гьамишалугъ уьмуьрда жедай чпин эхир хкязава.

 

 

 

Лезгинский исламский просветительский портал