Сусаринни къарийрин алакъаяр чими хьун патал Часть 2.

5. Сифте чIавалай башламишна куь ва къаридин арада мензил тур. Санал яшамиш жез башламишай гьа сифте йикъалай адаз куь территориядиз, куь уьмуьрдиз ва куь руьгьдиз рехъ ганвайди куьн я.
 
6. Гъуьлуьз садрани вичин диде-бубадикай пис рахамир. Иллаки дидедикай. Хва патал диде – гьамиша дишегьлидин акьалтIай жуьре я. Куьн патал ам – къари я, амма гъуьл патал – диде. Адаз ам гзаф кIан я. Бес зи хвани чIехи жезва хьи, гьавиляй зазни, аквадай гьалда, са чIавуз зунни жуван хциз гьа жуьреда кIан хьана кIанда.
 
7. Эгер квелай алакьзаватIа, табий хьухь. Бязи вахтара жув адан чкадал эциг. Ам четин уьмуьрдин рехъ кьиле тухванвай адетдин инсан я. Уьмуьрдин четинвилерин вакъиайри адан къилихар ва эдебар гьар вахтунда дегишарнава. Чунни бес малаикар туш кьван. Чакай гьихьтин къарияр ва бадеяр жедатIа, гьеле малум туш. Сада-садан гъалатIрилай гъил къачу. Ва квелай гъил къачузватIа, гьич важиблу туш. Сифте кам куьне къачу. Квез аквада хьи, алем, чна фикирзавай кьван мидяди туш. Генани а дишегьли куь дидедин чкадал кьурт1а, хъсан жеда. Бес чна дидедин гъалатIрилай гъил къачузва кьван. Эхирдай къаридикай ва сусакай са акьуллу кьиса хкиз кIанзава. Эвел вахтара са дишегьли яшамиш хьанай. Адавай къаридин туьгьметар эхиз жезвачир. Эхирни ам жерягьдин патав фена ва адавай вичин къари зегьерламишна чандивай ийидайвал куьмек тIалабна. Жерягьди къари патал агъу гудайдан разивал къалурна ва агъуди гьасятда къари чандивай тийидайди, анжах яваш-яваш вичин кар аквадайди виликамаз дишегьлидиз лагьана. 
- Ва рикIел хуьх, инсанрин шак вал тефидайвал, вуна ви ажугълувал муьтIуьгъарна кIанда. Адаз гьуьрмет ийиз вердиш хьухь, кIанивал къалура, ачух ва хъуьтуьл хьухь ва чIалаз килиг, - лагьана жерягьди. Дишегьли рази хьана. Гьа икI свас экуьнахъ фад къарагъиз къаридиз чай цаз, сивел хъвер алаз ва хъуьтуьлдаказ адаз ам гузвай. Къаридиз ам рикIин сидкьидай кIан хьана. Мукьвал вахтунда абур дидени руш хьиз хьана. Адалай кьулухъ вилерал накъвар алай свас жерягьдин кьилив хъфена ва адавай зегьердин къаншарда дарман тIалабна: 
«Минет хьуй, зи къари къутармиш за адаз гайи зегьердикай. Заз ам чандивай ийиз кIанзавач! Заз ам рикIин сидкьидай кIан хьанва!». Жерягь хъуьрена ва лагьана: 
- РикIик кьамир, за ваз са зегьерни ганач. Абур хуьрекдиз дад атун патал вегьезвай векьер тир. Зегьер анжах ви рикIе ва кьиле авай. Ва адакай азад хьайиди вун я.
Источник : Ас Салам
Лезгинский исламский просветительский портал