Миллетчивал – Исламдин душман

Миллетчивал – Исламдин душман

Гьайиф хьи, чаз мукьвал-мукьвал Дагъустанда ванер къвезва гьикI садбуру чпин миллет хъсанди я, масадбуру чпинди хъсанди я лугьузватIа. Идалай вилик Дагъустрандин душманриз чи республика са шумуд патал пайиз кIанзавай: лезгияр кьилди – «лезгистан», аварар кьилди «аваристан» ва мсб. Гьа вахтунда гзаф къалар арадал атанатIани, шукур хьуй Аллагьдиз, душманрин мурад кьилиз акъатнач.

 Исятда лагьайтIа, душманар Исламдин къене миллетчивал тваз чалишмиш жезва. Месела, ДУМД-дин адресдиз пис гафар лугьузва, гуя ам аварар кIватI хьанвай чка я, гьакъикъи шейхериз, месела, Саид-афанди, Абдулжалил-афандидиз (абурулай Аллагь  рази хьуй) аварар я лугьуз кьабулзавач. Сад лагьайди, ДУМД-да Дагъустандин вири миллетрин векилри кIвалахзава ва ДУМД-ди ийизвай кьван кIвалах Ислам раиж авун патал къе садани ийизвач. Кьвед лагьайди, устаз авар я лугьузвайдаз, бес чи шейх - Ярагъви Мугьаммад ханди санал тан тийидайла гьа аварри тушни ам кьабулайди. Абуру ам лезги я лагьанач хьи, вучиз лагьанач, вучиз лагьайтIа, рикIе иман авай касди ахьтин гаф садрани лугьудач.

  Миллетчивални Ислам сад-садаз акси шейэр я. ГьикI хьи, миллетчийрин мурад жуван миллет сад авун я, гьа са вахтунда Исламдин мурад вири дуьньядин халкь сад авун я.

   Инсанар ватандиз, жуван миллетдиз вафалу хьун миллетчивилин кьилин макьсад я, Исламдин кьилин макьсад лагьайтIа, инсанар Аллагьдиз  вафалу хьун я. Миллетчивал чилин сергьятрихъ, чIалахъ ва, гьелбетда, миллетдихъ галаз алакъалу я, Исламди лагьайтIа, и тафаватар инкар ийизва.  

Исламдиз вири инсаният Къуръандиз чпин ктабдиз хьиз, Кябедиз чпин кьибледиз хьиз ва гьакъикъи алимриз чпин кIвенкIвечийриз хьиз килигна кIанзава. Эхь, им авар, ам дарги я лагьана кIандач, альгьамдулиллягь, ам мусурман я ва ам садни са шумуд йисуз Исламдин илим кIелнавай еке алим, шейх я лагьана кьабулна кIанда.

 Аллагь-Таалади Къуръандин са аятдин куьмекдалди инсанрин арада авай миллетдин, хамунин ва чIалан тафават квадарна (мана): «Аллагьдин  вилик квекай виридалайни лайихлуди (хъсанди) виридалайни гзаф Аллагьдихъай  кIичIеди я» («Аль-Гьужурат» сура, 13-аят). Ибн Умара  ахъайнавай Пайгъамбардин (Аллагьдин салатни  салам  хьуй адал) гьадисда лагьанва: «Дугъриданни, Мекке мусурманри вахчур юкъуз Пайгъамбарди (Аллагьдин салатни  салам  хьуй адал) хутIба кIелна: «Эй инсанар! Гьакъикъатда, жагьилиядин (Ислам къведалди хьайи вахт) девирда куьне авур чIуру амалар ва бубайрин тIварар кьуналди жув вине кьун Аллагьди   квадарна. Инсанар кьве жуьрединбур ава: хъсан амалар ийизвай, Аллагьдихъай  кичIе - Аллагь-Тааладиз кIанибур ва бахтсуз, гунагькарар, - Аллагь-Тааладиз такIанди. Вири инсанар Адаман (Адал салам хьуй)  веледар я. Адамни (Адал салам хьуй)Аллагьди накьвадикай халкьнава («Сильсилят аль-агьадиси ас-сагьигьа).

Им жуван миллетдин тIварни кьадай ихтияр амач лагьай чIал туш. Заз чидай гьалда, гьар са инсандин рикI вичин миллетдихъ кузва, адаз вичин миллет вилик фена кIанзава, ихьтин гьисерар чIурубур яз гьисабзавач. Амма адет яз, миллетчивал и гьисеррал акъваззавач, адаз гзаф кIанзава ва гьа и арада Исламни миллетчивал сад-садахъ галаз женгиниз экъечIзава.

 

 

 

 

 

Лезгинский исламский просветительский портал