Кьиникь – Къияматдин югъ.

Кьиникь – Къияматдин югъ.

Махлукьатар халкь авудалай кьулухъ Аллагь-Таалди абуруз теклифна: «Ни Заз ибадат авун хиве кьада?» Мад Ада  лагьана: «Заз ибадат авурбуруз за кьадар авачир кьван няметар багъишда. Ибадат авун хиве кьун тавурбуруз я азаб, я няметар гудач, анжах хиве кьуна кьилиз акъуд тавурбуруз еке азаб гуда». Инсанди и теклиф кьабулна, ибадат авун хиве кьуна. Идакай Аллагьди  Къуръанда лагьанва (мана): «Вичи хиве кьунвай кардин важиблувиликай инсандиз хабар авачир

Ибадат авурла гузвай няметар сад я, бес ам тавурла гузвай азаб гьикьван къатиди жеда! Чун Къияматдин йикъан аламатар загьир хьанвай девирда яшамиш жезва. Гьиниз фейитIани чаз ихьтин гафарин ван къвезва: «Дуьньядин эхир, Къияматдин югъ!..» Дуьньядин эхир жедалди чал чан аламукьдатIа чизвач, анжах са шей чаз хъсандиз чизва: «Гьар са инсандин Къияматдин югъ ам кечмиш хьайи юкъуз алукьзава». Гьавиляй и йикъахъ хъсан гьазурвал акун паталди чна чаз маса инсанри авур гъалатIрикай тарс хкудна кIанда. И уьмуьр лайихлу къайдада тухудайвал ва Къияматдин юкъуз бедбахт инсанрин юкьва тежедайвал, чун гьамиша кичIевилинни умуддин арада хьун лазим я. Вучиз кичIевилинни умуддин! Вучиз лагьайтIа, гунагьар авур, вичелай Аллагьди  гъил къачун хъийидач лугьуз кичI акатай мусурманди Аллагь-Таалди Вичин регьимдалди гьатта гунагькаррилай гъил къачурди рикIел хкидайвал ва гьа идалди а касди Халикьдикай  умуд атIун тийидайвал. Эгер адаз капI-тIеат ийиз кугьул жез хьайитIа, Аллагьдин  азаб галукьай, Ада  терг авунвай халкьар рикIел хкана, Халикьдихъай  кичIе хьайила ада ибадат ийида.

Чеб кьузуь хьана лугьуз гьайиф чIугвазвай инсанар ава, абуруз чеб мад жегьил хъхьана кIанзава. Гьа ихьтин инсанар Исламди секинарзава, гьикI хьи, инсандин кьилин мурад и дуьньядал жегьил яз амукьун туш, рикIе иман хьун ва ам аваз эхиратдизни фин я. «Жегьилрикай виридалайни хъсанди ам я хьи, гунагьрикай жув хуьналди кьуьзуьбуруз ухшар жез алахъзавайди. Кьуьзуьбурукай виридалайни бедбахди Аллагь  рикIелай алудна, жигьилриз ухшар жез алахъзавайди я», - лагьанва Пайгъамбардин (Аллагьдин салатни  салам  хьуй адал)гьадисда.

Вич вуж ятIа инсан гъавурда акьадайвал адаз лукIран ва адан иесидин мисал бес жеда. Эгер квекай хабар кьуртIа: «ЛукIра вич иесидин вилик гьикI тухун лазим я?» - заз чидай гьалда, нивай хьайитIани адан везифайрикай лугьуз жеда. Чи арада, за фикирзава, икI лугьудай инсанар авач: «Зун лукI туш ва заз иесини авач!» Чун Аллагь-Тааладин лукIар тирди виридаз чизва хьи. Гила, бес чна, чун Аллагь-Тааладин – Халикьдин  вилик гьикI тухвана кIанда?! Инал, за фикирзавайвал, баян гун чарасуз тир са шейни авач. Месела, аялдизни кваз, вичи са чIуру кIвалах авурла, бубадин регьим тахьанайтIа жаза гудайди чизва. Гьатта аялди вичин бубадикай икI фикирзаватIа, вучиз лукIра вичин Иесидикай  фикирзавач: «Аллагьдин  регьим тахьанайтIа, Ада  заз еке жаза гудай». Мийир лагьанвай кар авурла Аллагьди  гьикI Адам пайгъамбар(адаз саламатвал хьуй) Женнетдай акъуднатIа ша чна рикIел хкин. Бес чун са йикъан къене Аллагьдиз  шумуд сеферда аси жезва?! И кардин гьакъиндай чна фикирна кIанда. 

Лезгинский исламский просветительский портал