Чирвал къачунин важиблувал. Часть 2

Аллагь Таалади пак тир Къуръанда лугьузва (мана):«Бес чирвал авайбурни авачирбур сад-садахъ галаз гекъигиз жедани?» («Аз-Зумар» сура, 9-аят). 

Маса аятда лугьузва (мана): «Вичин арадай тир диндал кIевибур муькуь дуьньяда, Аллагьди виниз акъудда, амма чирвал ганвайбурун дережа амадалайни хкажда» («Аль-Мужадила» сура, 11-аят). Ибн Аббаса (чпелай Аллагь рази хьурай) вичин тафсирда аятдиз ихьтин баян ганва: «Муъминрин дережадилай алимрин дережа ирид виш сеферда артух жеда ва абурун арада вад виш йисуз къекъвей рекьин мензил жеда». 

Къуръандин маса аятда Аллагь Таалади лугьузва (мана):«Дугъриданни, Аллагьдихъай кичIебур анжах чирвал авайбур я» («ФатIыр» сура, 28-аят). Яни, Аллагьди чи хиве тунвай везифаяр, пис-хъсан, гьалал-гьарам анжах чирвал авайбуруз малум я. Эгер абур кьилиз акъуд тийиз хьайитIа, Къияматдин юкъуз инсан гьихьтин мусибатрик жедатIа анжах чирвал авайбуруз ашкара я. Чирвилерин къиметлувал ва важиблувал къалурзавай Пайгъамбардин (салат ва салам хьуй адал) гьадисар гзаф ава. Агъадихъ са тIимил ганва: «Эгер Аллагьдиз са инсандиз хъсанвализ кIан хьайитIа, ахьтин инсан Халикьди диндин гъавурда твада» (Бухари, Муслим). Гьадисдай гъавурда акьазвайвал, чирвал къачуз чалишмиш хьанвайбур, Аллагьдин регьимдик акатнавай хушбахтлубур я. «Я инсанар, чирвилер анжах абурухъ чалишмиш хьайила ахпа жеда» (ТIабарани).

Яни, чирвилерин иеси хьун патал, абурун гуьгъуьна хьана кIанда. «КIваляй чирвилер къачуз экъечIай инсандиз Аллагьди, Женнетдиз фидай рехъ регьятарда» (Муслим, Гьаким, Тирмизи ва мсб).

«Буюр, чирвилерихъ къекъвезвайди», - гьа ихьтин гафар лугьуналди малаикри чирвилерихъ къекъвезвай инсан элкъуьрна кьазва. Ахпа абуру чирвилерихъ авай чпин кIанивал къалурун паталди, сад-садан винел акьахна сад лагьай цаварал кьван агакьзава» (Имам Агьмад, ТIабарани, Гьаким, Ибн Маджа ва мсб).

«Чирвилерихъ къекъвезвай Аллагьдин гьар гьи лукI хьайитIани, адан къекъуьнар себеб хьана икьван гагьда адай акъатай гунагьар михьи хъжезва» (Тирмизи, ТIабарани).

«Гьакъикъатдин рекьел тербияламишзавай ва гьар са завалдикай хуьзвай, чирвилерилай къиметлу садавайни са шейни къазанмишиз хьанач» (ТIабарани).

«Чирвилерихъ къекъвезвай инсанди гьа рекьел чан гайитIа ам, шагьид жеда» (ТIабарани, Аль-Баззар). 

 Кат1 ама ...

Предыдущая глава

Лезгинский исламский просветительский портал