Эй мусурман, тIимил неъ!

Абуль-Къасим аль-Багъавиди вичин «Муъжам» тIвар алай ктабда Абдуррагьман ибн аль- Муракъкъагьалай атанвай гьадис агакьарна:

«Аллагьдин Расулди (Аллагьдин салатни салам хьуй адал), Хайбар къачур вахтунда, ам къацувили ва емишри безетмишнавай. Инсанри гьерекатна емишар тIуьна ва абур къиздирмадик начагъ хьана. Абуру Пайгъамбардиз (Аллагьдин салатни салам хьуй адал), арза авуна ва Пайгъамбарди (Аллагьдин салатни салам хьуй адал), лагьана: «Къиздирма – им кьиникьин къуллугъчия ва чилел алай Аллагьдин дустагъхана ва им ЦIун пай я. Эгер квез ада тади гузватIа, целера авай яд къайи авуна, ам кьве кпIунин (рагъдан ва месин) арада квел илич». 

Абдуррагьмана ахъайна: «Абуру гьакI авуна ва къиздирма алатна, ва Аллагьдин Расулди (Аллагьдин салатни салам хьуй адал), лагьана: «Аллагьди хук хьтин ацIурдай (эгер ам михьидаказ ацIурайтIа) пис чка халкьнавач. Гьавиляй, эгер чарасуз (ам ацIуриз) хьайитIа, къуй адан руфунин са пай тIуьниз, са пай – хъуниз ва са пай – нефес чIугваз регьят хьун патал буш яз турай». И гьадис медицинадин вири бинеяр сад ийизвай диб я. И гьадис кIелай духтур Ибн Аби Масавейха лагьана: «Эгер инсанри а гафар ишлемишнайтIа, абур азаррикай къутармиш жедай, азарханаяр ва аптекаяр кIвалах амачиз амукьдай». Ада акI лагьана, вучиз лагьайтIа, вири азаррин бине – хуквадин кIвалах чIур хьун я. Арабрин духтур аль-Харис ибн Къаляда лагьана: «ТIимил тIуьн – им вири дарманрин кьил я, амма руфуниз къуллугъун – им вири азаррин кьил я». Аль-Хариса генани лагьана: «Инсанар кьиникьин ва тIебиатда ничхирар телеф хьунин себеб, са тIуьн цIурурдалди адан винел маса тIуьн ракъур хъувун я». 

Лезгинский исламский просветительский портал