Ражаб – Аллагьдин варз

Гьуьрметлу мусурман стхаярни вахар, ингье мад чун рикI алай пак варцарихъ галаз гуьруьш хъижезва. Алатай йисан Рамазандин вацран ахъа хьайи сивер ам цIийиз алукь хъийидалди къаза хъувуна кIанда, шариатди кьабулдай уьзуьр (багьна) авачиз абур къаза хъувун тавуртIа, гунагь ва жерме къвезва. Ражаб вацра Рамазандин вацран сив къаза хъийиз хьайитIа, къазани сувабдин сив санал хвейитIа жеда.

Ният икI ийида: «Ният авуна за пакад юкъуз Рамазандин ферз къаза сивни Ражабдин сувабдин сив хуьниз Аллагь паталди».

Ражаб неинки пак пуд вацран (Ражаб, Ша’бан, Рамазан) эвелда авай варз я, ам гьакIни Халикьди виче къадагъаяр тунвай кьуд вацракайни (Ражаб, Зуль-къада, Зуль-гьижа, Мугьаррам) сад я, и варцара дявеяр, къал-макъалар авун Аллагьди  гьарамнава. Виликдай Ражаб варз алукьайла, Кябдихъ гелкъвезвайбуру ам сифте йикъалай эгечIна а вацран эхиримжи йикъалди ачухдиз тадай, им пак вацраз ийизвай чIехи гьуьрметдин лишан тир. Муькуь варцара абуру Кябе ислен ва жуьмя йикъариз ачухдай. Абуру икI лугьудай: Ражаб – Аллагьдин  варз я, и КIвални (Кябе) Аллагьдинди я, инсанарни Аллагьдин  лукIар я, гьаниз килигна чавай абур Аллагьдин  вацра Адан кIваливай къакъудиз жедач. Пайгъамбарди (Аллагьдин салатни  салам  хьуй адал) лагьана: «РикIел хуьх, Ражаб – Аллагьдин варз я, и вацра са юкъуз хьайитIани сив хвейи касдилай Аллагь рази жеда». И вацра еке сувабар (хъсан крар авурбуруз), жумартвилер ракъурзавайвиляй (Халикьди) адаз Аллагьдин  варз лугьузва.

Гьадисда лагьанва: «Ражаб вацра са юкъуз хьайитIани сив хвейи кас Фирдавусдин Женнетдиз гьахьда. Кьве юкъуз сив хвейи касдиз – кьве сеферда артух пишкеш гуда. Пуд юкъуз сив хвейи кас патал, ам жегьеннемдин цIувай чара ийидай еке фур эгъуьнда, адан екевал акьван гзаф жеда хьи, са патай муькуь патаз фин патал са йис вахт акъатда. И пак вацра кьуд юкъуз сив хвейи кас Халикьди гижи хьуникай, филин азардикайни (слоновая болезнь) жузам азардикай (проказа) хуьда. Вад юкъуз сив хвейи кас сурун азабрикай хуьда. Ругуд юкъуз сив хвейи кас Къияматдин юкъуз чина ацIай вацралайни гзаф нур аваз ва гуьрчег яз къарагъарда. Ирид юкъуз сив хвейи кас патал жегьеннемдин ирид ракIар агалда. Муьжуьд юкъуз сив хвейи касдиз Аллагьдин  Женнетдин муьжуьд ракIар ачухда. ЦIукьуд юкъуз сив хвейи касдиз ахьтин хъсан, иер пишкеш гуда хьи, адакай гьеле са чан алай шейинизни ван атанвач. Ражаб вацран цIувад юкъуз сив хвейи касдин дережа акьван виниз акъудда хьи, а касдин патавай ихьтин гафар талгьана гьич са малаикни алатдач: «Мубаракрай ваз, вун къутармишнава ва хатасузвилелди таъмин я». Ражаб вацран вири йикъара сив хвейи ксариз лап еке суваб хиве кьунва. Абу Гьурайрадилай  атанвай гьадисдай аквазвайвал, и вацра 27 юкъуз сив хвейи касдиз 60 вацра сивер кьур кьван сувабар кхьида. Айшади  чал агакьарнавай гьадисрикай сада лагьанва: «Пайгъамбаррилай (Аллагьдин салатни  салам  хьуй адал), абурун мукьва-кьилийрилай ва Ражаб, Ша’бан ва Рамазандин варцара сив хвейибурулай гъейри амайбур вири Къияматдин юкъуз гьарарат жеда». Анас ибн Малика агакьарнавай гьадисда лагьанва: «Ражабдин вацра сивер хуьх, вучиз лагьайтIа Аллагьди  и вацра хвейи сивер туба хъувунин кьетIен жуьре хьиз кьабулзава». Мусурманди вичи авур кьван гунагьар и вацра рикIин сидкьидай туба хъувун, руьгь чIуру ниятрикайни, фикиррикай михьи хъувун лазим я ва жезмай кьван гзаф хъсан крар ийиз алахъна кIанда. Гзаф гьадисра лугьузвайвал, Ражаб вацран йифер Аллагьдиз  ибадат авуниз, дуьаяр, зикирар кIелуниз бахшна кIанда. Амма Ражаб вацра авун меслят къалурзавай виридалайни хъсан кар туба (Аллагьдивай гунагьрилай гъил къачун тIалабун) авун я. Лугьуда хьи, Ражабдин вацра чилиз тумар гадарда – яни инсанди туба ийида. Ша’бандин вацра а тумариз яд гуда – яни, туба авурдалай кьулухъ, инсанди хъсан крар ийиз эгечIда. Рамазандин вацра лагьайтIа, бегьер кIватI хъийида – яни, туба авуна, хъсан крар авурдалай кьулухъ, инсан Аллагьди  вини дережадиз акъудда.

 

 

 

Лезгинский исламский просветительский портал