Папаз аялар тежезвайвиляй кIвале къал ава

Сад лагьайди, Пайгъамбардин (Аллагьдин салатни  салам  хьуй адал) гьадисда лагьанва:

«ЧIехидаз гьуьрмет тийизвайди ва гъвечIидаз регьим тийизвайди чакай туш». Иниз килигна, куь папа куь дидедиз гьуьрмет авуна ва дидеди вичин сусаз регьим авуна кIанда.

Кьвед лагьайди, аялар хьана кIанзавай, анжах тежезвай хизанди вуч авун лазим я?! Сифте нубатда, Аллагьдик умуд кутуна кIанда, Адавай куьмек тIалабун герек я, къал акъуд тавуна вири Аллагьдин патай тирди фикирда аваз, сабурна кIанда. Адалай кьулухъ, медицинадин ахтармишунар тухвана кIанда, бес медицина Аллагьди ганачни кьван?!

Аллагьдин Расулди (Аллагьдин салатни  салам  хьуй адал) лагьана: «Аллагьди азар рекье тур вахтунда, ам сагъардай дарманни рекье твазва» (Имам аль- Бухари). АкI хьайила инсанди, яргъал вегьин тавуна Исламдихъ галаз кьадай чарасуз, гьар гьи дарман хьайитIани авун лазим я. Эгер Аллагьдин эмирдалди хизан сагълам ятIа, амма аялар авачтIа, акI хьайила Аллагьдин эмирдалди квез аялар жеда, эгер куьне Исламда авай тайин тир дуьаяр кIелиз хьайитIа. Закария пайгъамбар, салам хьуй адаз, агьил тир. Вичиз несил авачирвиляй Аллагьдихъ элкъвена ада дуьа авуна. Идан гьакъиндай Къуръанда лагьанва (мана): 

«Закарияди Аллагьдихъ элкъвена дуьа авуна: «Я Аллагь! Заз хъсан несил це, гьакъикъатда, Вун – дуьайрин Ван къвезвайди я»

(«Аль Имран» сура, 38- аят).

Генани маса дуьа (мана):

«Закариядал атай Аллагьдин регьим рикIел гъун я, ада вичин Халикьдивай чинеба тIалабна: «Я зи Аллагь! Гьакъикъатда, зун кьуьзуь ва зайиф я ва зи кьил рехи хьанва, за Ви дуьадикай умуд атIанвач ва заз жувалай кьулухъ несил амукь тийиз кичIезва, зи папаз аялар жезвач, акI хьайила заз куьмекчи (хва) це»

(«Марьям» сура, 2-5-аятар).

Аллагьдивай Закария пайгъамбарди (Салям хьуй адал) адатIалабай жуьреда куьнени тIалаб (иллаки йифен кьулариз, тагьажуд кпIунилай кьулухъ ва маса хъсан вахтара) ва Аллагьдиз кIан хьайитIа, Вичин пайгъамбардиз (Салям хьуй адаз) аял гайи жуьреда квезни гуда. Ахьтин дуьа Аллагьдихъ умуд аваз араб чIалал кIелайтIа хъсан я. Эгер квез а дуьа чизвачтIа, я туштIа араб чIалал кIелиз жезвачтIа, квевай рикIин сидкьидай жуваз чидай чIалал кIелайтIани жеда ва Аллагьди ам кьабулда, ин ша Аллагь

Лезгинский исламский просветительский портал