Салаватдихъ галаз атай куьмек

Суфьян ас-Савриди, Аллагь рази хьурай вичелай, ахъайзава: «Зун Кябедал элкъвезвай (тIаваф) ва и вахтунда заз гьар са кам къачурла Мугьаммад Пайгъамбардиз (Аллагьдин салатни салам хьуй адал) салават кIелзавай инсан акуна. За адаз лагьана: 
- Тасбигь (субгьаналлагь) ва тагьлиль (ля илягьа илляллагь) туна вуна гьамиша Пайгъамбардиз (Аллагьдин салатни салам хьуй адал) салават кIелзава. Идан жигьетдай амайбуруз хабар авачир, амма ваз чизвай са шей хьайитIани авани? 
- Вун Аллагьдин регьимдик хьурай, вун вуж я? – лагьана ада. 
- Зун Суфьян ас-Саври я. Ада лагьана:
- Эгер вун алай аямдин чIехи алимрикай ва пак инсарикай туширтIа, за ваз зи гьалдикай ва сирдикай ахъайдачир. За гьар са къадам къачурла, Аллагьдин Расулдиз (Аллагьдин салатни салам хьуй адал) салават кIелунин себеб агъадихъ галай дуьшуьш я. Бубадихъ галаз санал чун гьаждал фена. Нубатдин сеферда чун ял ягъиз акъвазнавайла, буба бейхабардиз начагъ хьана ва ада чан гана. Ам рагьметдиз фенмазди, адан чин чIулав, вилер вили хьана ва руфун дакIуна. Зун шехьзавай ва гьа са вахтунда за лугьузвай: «Гьакъикъатда, чун Аллагьдинбур я ва Адан патав хъфида. Зи буба гъурбатда рагьметдиз фена». Ахпа за адан чин перемдалди кIевна. 
И вахтунда зун ахварал фена. Ахварай заз са инсан акуна. Акьван гуьзел чин авай, гзаф михьи парталар алай ва вичихъай гьакьван хъсан ни къвезвай инсан икьван гагьда заз акурди тушир. А инсан зи бубадив агатна ва адан чинилай гъил тухвана. Бубадин чин гьасятда некIедилайни лацу хьана. Ахпа ада бубадин руфунилай гъил тухвана. ДакIунвай руфун гьасятда дуьз хъхьана. Адалай кьулухъ, а инсан хъфиз гьазур хьана. Зун тадиз къудгъунна къарагъна ва адан парталрин къерехар кьуна, лагьана:
 - Я жанаби! Аллагьдин хатурдай, куьн вуж ятIа лагь заз? 
- Ваз зун чир хьанвачни бес? Зун, Аллагьдин Расул – Мугьаммад (Аллагьдин салатни салам хьуй адал) я. Ви бубадихъ гзаф гунагьар авай, амма ада заз гзаф салаватар кIелна. Адан кьилел бедбахтвал атайла, ада завай куьмек тIалабна ва зун атана. Заз гзаф салаватар кIелзавайбур патал и дуьньядани ва эхиратдани зун куьмекчи жеда. И вахтунда зун ахварай аватна ва бубадин чин лацу хьанвайди ва дакIунвай руфун ацукь хъувунвайди заз акуна».
 
Лезгинский исламский просветительский портал