Мугьаммад Пайгъамбар ( Аллагьдин салатни салам хьуй адал) вири инсаниятдин Пайгъамбар я!

Гьар са затIунихъ вичин халикь ава. Гьелбетда, дуьньядихъни вичин халикь ава. Дуьньядин халикь лагьайтIа, Аллагь-Таала я. Къуръанда лагьанва (мана): «Ихьтин гуьзел къайдада аваз цавар ва чилер, куь чIалар ва нугъатар, гьар жуьредин рангарин чIарар ва вилер хал-кьун Аллагь-Тааладин зурбавилин делил тушни мегер? Акьул ва чирвилер авай ксар патал ибур делилар я» («Ар-Рум» сура, 22-аят).

 Аллагь-Таалади гьакI гьавайда са затIни халкь-навайди туш. Гьар са халкьнавай затIунихъ вичин везифа ва гьикмет ава. Аллагьди  халкь-навай затIарикай виридалайни тамамди инсан я. Инсан Аллагь-Таалади Вичиз ибадат авун патал халкьнавайди я. Къуръанда лугьузва (мана): «За инсанар ва жинерар Жуваз ибадат авун патал халкьнавайди я» («Аз-Зарият» сура, 56-аят).   Аллагь-Таала гьич са касдин ибадатдихъни муьгьтеж туш, абурун ибадатар авуналди Адан пачагьлугъ артух тежедайвал, абур тавуналди ам тIимилни жедач. Ада инсан Вичиз муьтIуьгъ жедатIа ахтармишун патал халкьнавайди я. Инсанрив дин агакьарун патал Аллагьди Вичин регьимлувиляй абурун кьилив Вичин пайгъамбарар ракъурна. Сифте яз Аллагьди халкь авур ва пайгъамбар яз ракъурай инсан Адам пайгъамбар  я. Адаман  девирди-лай башламишна Аллагьди  инсаниятдиз дин гваз пайгъамбарар ракъурна. Аллагьдин  вири Каламра пайгъамбаррикай эхирмижиди Мугьаммад Пайгъамбар  жедайди лагьанва ва адахъ инанмиш хьун эмирна. Вири инсаниятдиз, гьатта жинеризни, Къияматдин югъ алукьдалди ракъурнавай пайгъамбар Мугьаммад  я. Инсандикай агалкьунриз, девлетдиз килигна пайгъамбар жезвайди туш. Аллагь-Таалади Вичин лукIарикай кIаниди пайгъамбарвиле хкязава ва адакай Вичин гьакъикъи дин гвай, тамам чешнелу кас ийизва. Аллагьдин  динда миллетриз фикир гуз-вайди туш. Эгер Мугьаммадал  къведалди хьайи пайгъамбаррин гуьгъуьналлаз кьилди халкьар фенатIа,   Мугьаммад Пайгъамбар вири инсаниятдин кьилив ракъурнава ва адан гуьгъуьналлаз дуьньядин вири пипIера авай инсанар фена. Ислам динди мусурманривай Аллагьдин  пайгъамбаррин арада тафаватлу-вал тун тавун, гьар са пайгъамбардихъ инанмиш хьун ва гьар садаз гьуьрмет авун исте-мишзава. Къуръанда лагьанва (мана): «Аллагьди Вичин Калам гваз ракъурнавай гьар са пайгъамбардихъ галаз икьрар кутIунна. Инсанриз лагьана, эгер куь патав вичин гьахълувал тестикьарзавай гьакъикъи пайгъамбар атайтIа, куьн адахъ инанмиш хьухь» («Алю Имран» сура, 81-аят). Дин «чиди» ва я «куьди» жедайди туш. Ам Аллагьдин патай я. Исламни Аллагьдин патай вири инсаниятдиз ракъурнавай дин я, Мугьаммадни  неинки арабриз, гьакI вири инсаниятдиз ракъурнавай Аллагьдин Расул  я. Аллагь-Таалади Ислам дин ракъурайдалай гуь-гъуьниз, амай динар элкъуьрна ва инсанриз виридаз Мугьаммад Пайгъамбардин  гуьгъуьна хьун эмирна. Къияматдин югъ алукьдалди Мугьаммадан  пайгъамбарвал тестикьарзавай виридалайни чIехи муъжизат Къуръан я. Къуръан - им мусурманди вичи-вич и дуьньяда тухудай къайдаяр къалурнавай ктаб-къанун. Мугьаммад Пайгъамбардал  къведалди ракъурнавай вири Каламра инсанри дегишвилер туна. Анжах Къуръан - им чIур ийиз тахьай ва Къияматдин йикъалди чIуриз тежедай Аллагьдин  Ктаб я. Къуй Аллагьди  Мугьаммад Пайгъамбардихъ авай чи муьгьуьббат артухаррай! Амин

 

 

 

 

 

 

 

 

 

 

 

 

 

 

 

 

 

 

 

 

Лезгинский исламский просветительский портал