Аввабин суннат-капI инкар авун дуьз яни?
- Подробности
- Автор: Admin
.jpg)
Дуьз рекьелай алатнавайбуру, чпин гафариз къуват яз, тестикьарзава хьи, гуя аввабинрин кпIар авун суннат я лугьузвай гьадисар чеб зайифбур я. Мадни абуру аввабинрин кпIар рагъ экъечIайдалай кьулухъ ийизвай кпIар (зугьа) я лугьузва. Амма а авамриз Мугьаммад Пайгъамбарди (Аллагьдин салатни салам хьуй адал) гъетрен кпIунилай кьулухъ ийизвай суннат- кпIаризни аввабинрин кпIар лагьайди чизвач. ГьакIни абуруз зайиф гьадисрални, эгер абуру хъсан крарикай, хуш къилихрикай, ерийрикай ихтилат физватIа, амал ийидай ихтияр авайди чизвач. Идалайни гъейри, эгер гьа са месэладин гьакъиндай са шумуд зайиф гьадис гъанваз хьайитIа, а гьадисри гьакъикъи гьадис эвез ийида (яни са шумуд зайиф гьадис санлай къачурла абур гьакъикъи са гьадисдиз барабар жеда).
Аввабин гъетрен кпIунилай кьулухъ Пайгъамбарди (Аллагьдин салатни салам хьуй адал), гьакI адан асгьабри ва табиинри (асгьабрин гуьгъуьнай атай несил), кьуд мазгьабдал амал ийизвай вири алимри ийизвай. Аввабинрин кпIар авур са шумуд асгьабдин тIварар кьаз жеда. Ингье абур: Абдуллагь ибн Мас’уд, Абдуллагь бин Умар, Салман аль-Фариси, Анас бин Малик ва масабур. Абурун гуьгъуьнлай атай несилдай Али Зайну-ль-Абидин бин Гьусейнан, Саид бин Жубайран, Мугьаммад бин Мункъадиран ва масабурун тIварар кьаз жеда. Абурулай гуьгъуьниз, гила пайда хьанвай дуьз рекьелай алатнавайбурулай гъейри, аввабинрин кпIар герек авач лагьай гьич са касни, са алимни хьанач. Чна винидихъ лагьайвал, эгер зайиф гьадисар жуьреба-жуьре риваятар (версияр) аваз са шумуд чкадал гъанваз хьайитIа, абур гьакъикъи гьадисдай кьаз жеда. Агъадихъ чна са шумуд гьахьтин гьадис гъизва.
1. Имам Насаиди Гьузайфадилай атанвай гьадис гъизва: «Аллагьдин Пайгъамбарди (Аллагьдин салатни салам хьуй адал) гъетрен кпIунилай кьулухъ месин капI жедалди суннат- кпIар ийидай».
2. Умар бин Ясиралай имам ТIабараниди чал ихьтин гьадис агакьарнава: «Заз зи рикI алай Пайгъамбарди (Аллагьдин салатни салам хьуй адал) гъетрен кпIунилай кьулухъ ругуд кьил суннат-кпIар ийиз акуна».
3. Имам ТIабаранидини имам Агьмада Убайдадилай ихьтин гьадис агакьарна: «Аллагьдин Расулди (Аллагьдин салатни салам хьуй адал) гъетренни месин кпIарин арада суннат-кпIар авун буйругъдай».
4. Тирмизиди ихьтин гьадис агакьарнава: «Гъетрен кпIунилай кьулухъ ругуд кьил суннат-кпIар авун цIикьвед йисуз Аллагьдиз ибадат авунихъ галаз гекъигзава».
5. ТIабаранидилай атанвай гьадисда лугьузва: «Гъетрен кпIунилай кьулухъ ругуд кьил суннат-кпIар авур инсан гунагьрикай михьзава, гьатта абур гьуьлуьн каф кьван гзаф аватIани».
6. Ибн Мубаракалай агакьнавай гьадисда лугьузва: «Гъетренни месин кпIарилай кьулухъ ийизвай кпIариз аввабинрин кпIар лугьуда».
«Аввабин» Аллагь гзаф кIан хьун себеб яз Адахъ тамамдиз элкъвенвай касдиз лугьузва. Месела, нянихъ, галат хьанваз кIвалахдилай хтайла, фу тIуьна ял акъадарзава, агалтзава, юргъунвал рекьизва. Ихьтин легьзейра Аллагь рикIелай алатзава. Вирида ял ядайла кпIар ийизвайбуруз тамамдиз Аллагьдихъ, Ам пара кIан хьун себеб яз, элкъвенвайбур лугьуда. Аввабинрин сунат-кпIарикай алава малуматар «Итгьаф» ктабдай (3-том, 614-617-чинар) къачуз жеда.
Винидихъ гъанвай гьадисрикай гьар сад кьилди къачуртIани аввабинрин суннат-кпIар авун патал тамам делил я. Чаз чиз ягъалмишбурун мурад Исламдай хъсан ва хийирлу шейэр акъудна чи дин михьиз ичIи авун я.
Добавить комментарий
