Дишегьлийриз насигьат

Дишегьлийриз насигьат

Са юкъуз Али асгьаб  вичин пабни галаз Пайгъамбардин  кьилив атана. КIвализ гьахьайла, абуруз чилел ацукьна шехьзавай Аллагьдин  Расул  акуна. ФатIимади  жузуна: «Я Расуляллагь , вун вучиз пашман я? Ви вилерай накъвар куь гъана?» Пайгъамбарди лагьана: «Исраъдин ва Ми’раждин йифиз Аллагь-Таалди заз Жегьеннемда гьар жуьредин азабар гузвай зи умматдай тир дишегьлияр къалурна. Зун исятда абурун гьакъиндай шехьзава». 

ФатIимади  вичиз абурукай ахъаюн тIалабна. Пайгъамбарди лагьана: «А йифиз заз Жегьеннемда чпин мецерикай, хуруйрикай куьрсарнавайбур акуна. Мад кIвачер кьилел кутIунавай, мурдаррини акьребри къвалалай як незвай дишегьлияр акуна. ЧIулав чин алай, вичи-вичин мефтIер незвайбур акуна. Буьркьуь, биши ва рахаз тежезвайбур акуна. Къабандин кьил ва ламран беден алай, азабдик квайбур акуна. ГьакIни, кцIин бедендиз ухшар авай чIарарикай куьрсарнавайбур...»

И гафарин ван хьайи ФатIимади  хабар кьуна: «Я Расуляллагь , я зи вилерин нур, а дишегьлийриз ахьтин азаб вучиз гузва?» Пайгъамбарди лагьана: «ЧIарарикай куьрсарнавайбур чпин чIарар чара итимрин вилерикай хуьн тийизвайбур я. Мецикай куьрсарнавайбур – чпин мецералди инсанриз зиян гузвайбур. Хурудикай куьрсарнавайбур – чпин итимриз хабар авачиз чара аялриз хурудин нек гузвайбур. КIвачерикай куьрсарнавайбур –итимдин ихтияр авачиз кIваляй экъечIзавай ва вацран кьилер куьтягь хьайила жендек чуьхуьн тийизвай дишегьлияр я. Чпи-чпин як незвайбур – чара итимар патал, абуруз иер къалурун патал чеб чIагурзавай ва гъибет, буьгьтен ийизвайбур. КIвачер пелел кутIунна мурдаррини акьрабри як незвайбур – чпин хиве авай ферзер (капI, сив хуьн...) кьилиз акъуд тийизвайбур. Къабандин кьил ва ламран беден авайбур – инсанрикай фитне ийизвай, гьамиша тапарарзавайбур. КицIин беден авайбур итимар нарази, халкьдин арада гъулугъула твазвай дишегьлияр я». Гьуьрметлу вахар, гьадисдин сифте кьиле вуч кхьенватIа квез аквазавани: Пайгъамбар  Жегьеннемда кузвай, гунагькар дишегьлийрин гьакъиндай шехьзавай. Бес вучиз дишегьлияр чеб шехьзавач, вучиз Шариатдал амал ийизвач? Гьуьрметлубур, винидихъ тIвар кьур гьар са дишегьлидиз чир хуьн лазим я, ада ийизвай карди Аллагьдиз  виридалайни кIани Пайгъамбардин  вилерал накъвар гъанвайди.

Пайгъамбарди гьакIни лагьана: «Куьне заз вад шей ийида лагьана гаф це, за квез куьн Женнетдиз фида лагьана гаф гуда:

1.     Куьн рахадайла, са ихтилат ийидайла гьахъ лагь;

2.     Хиве кьур кIвалах кьилиз акъуд;

3.     Аманат яз квев са шей вугайтIа, вахт атайла, ам иесидив вахце;

4.     Куь беденрин паяр гьарамдикай хуьх;

5.     Гьарамдиз килигмир;

6.     Куь гъилер угъривиликай  хуьх.

И шартIарал амал авур касдиз Женнет кьисмет жеда, лагьана Пайгъамбарди  гаф ганва. Ша буюр, ая, Женнетда чка яхъ!

 Мад Пайгъамбарди  лагьана: «Гьакъикъатда, ни вичин жегьилвал гунагьрикай хвейитIа ам Женнетдиз фида».

Фикир гайитIа, Женнет къазанмишун паталди чаз са тIимил герек я: жуван жегьилвал хуьн ва чIуру алакъайрикай къакъатун. Гьайиф хьи, гзафбур и кардин гъавурда акьазвач, ягъалмиш жезва ва Женнет ваъ, Жегьеннем къазанмишзава.

Къуй Аллагь-Таалади гьар са мусурман стхадиз ва вахаз Женнет кьисметрай, Жегьеннемдин цIукай къутармишрай! Амин.      

 

Лезгинский исламский просветительский портал